Dhimbje cervikale dhe probleme stomatologjike

Rëndësia e punës në ekip midis fiozioterapistit, stomatologut dhe mjekut maksilo-facial

Davide Di Segni

Deri pak vite më parë, personat e prekur nga çrregullimet si dhimbje koke apo marrje mendsh në zonën temporo-mandibulare, ishin të detyruar që në një mënyrë apo në një tjetër të vuanin, duke konsumuar sasi të mëdha barnash kundër dhimbjes dhe duke u endur nëpër disa mjekë në kërkim të një zgjidhje. Për fat të keq, pjesërisht, akoma dhe sot një gjendje e tille nuk ka ndryshuar!

Fatmirësisht janë bërë hapa të mëdha përpara në diagnostikimin e shkaqeve mekanike të çrregullimeve dhe janë prezantuar risi terapeutike shumë interesante, por ekziston akoma një numër i madh i personave që "enden" nëpër klinika dentare, maksilo-faciale, fizioterapistë dhe "magjistarë të ndryshëm" të kuptuar si figura jo të kualifikuara që trajtojnë këto çrregullime.

Si fizioterapist që jam, merrem shpesh me këto lloj çrregullimesh dhe puna në ekip me mjekë stomatologë dhe maksilo-facialë çon shpesh në reduktimin e dhimbjeve kronike deri në shërim.

Të trajtosh problematikat e gojës apo ato cervikale në mënyrë sektoriale, duke menduar se i zgjidh ato, duke i trajtuar vetëm nga këndvështrimi personal, është me shumë mundësi e gabuar dhe shumë pak në interesin e pacientit dhe të patologjisë së tij. Përndryshe, nëse jemi përballë një problemi të llojit strukturor, bashkë me një, të një lloji funksional, do të jetë thelbësore puna në ekip.

Roli i riekuilibrimit muskulor:
Një zonë anatomike që tregon në një farë pike shenja të vuajtjes, është mundësisht simptomë jo e një problemi lokal të lindur nga një ditë në tjetrën, por e një situate që është krijuar me kalimin e kohës dhe që ka çuar të gjithë sistemin që të "punojë" keq.

Për këtë shpesh ndodh që një trajtim stomatologjik edhe nëse është kryer në mënyrë të shkëlqyer nuk çon në zgjidhjen e dhimbjes së kokës së pacientit dhe ndonjëherë sjell përkeqësimin e një situate latente.

Shumë shpesh takoj pacientë që i janë nënshtruar kurave stomatologjike muaj më parë dhe tani paraqesin dhimbje cervikale të rëndësishme që më parë nuk ishin të pranishme. Nëse do të arrinim në fakt të kryenim një punë në ekip jam i sigurt që gjërat do të ndryshonin për mirë duke vënë në qendër pacientin dhe nevojat e tij dhe duke përqendruar kështu një seri ndërhyrjesh të synuara në bazë të kërkesave specifike.

Detyra e fizioterapistit do të jetë kështu një punë mbi muskulaturën mastikatore, duke analizuar dhe trajtuar disfunksionet muskulore dhe artikulare në nivelin e vertebrave cervikale.

Fizioterapisti mund të disponojë shumë teknika, manovra dhe instrumente teknike me paktin që të ekzistojë një projekt me një rrjedhë të menduar, pikërisht në fazën fillestare. Trajtimi për të kuruar cervikalen është shumë delikat dhe problematikat e dhëmbëve përfaqësojnë shkakun në rreth 30% të rasteve.

Do të jetë kujdesi i fizioterapistit që të punojë në mënyrë direkte mbi çrregullimin apo të ndihmojë pacientin me ushtrime dhe këshilla praktike për të kuruar dhimbjet e zakonshme dhe të përditshme dhe të favorizojë kështu një rikthim në normalitet.

Pasi janë përcaktuar dhe përqendruar objektivat nga ana e mjekut stomatolog, do të jenë të nevojshme rivlerësime të vazhdueshme, ndoshta me frekuencë mujore për t'u siguruar se puna vijon në drejtimin korrekt dhe të merren parasysh të gjitha variantet e mundshme që ndoshta kërkojnë rregullime.

Dua të theksoj rolin e ekipit, që nëse punon në akord të përbashkët arrin që të menaxhojë më mirë edhe aspektin psikologjik të personave që kanë çrregullime prej shumë kohësh dhe që do të dëshironin, që si me magji, të shikonin të zhdukeshin dhimbjet nga një seancë në tjetrën.

Fatmirësisht rastet që i rezistojnë një pune vërtetë të gjerë dhe të mirë strukturuar janë gjithmonë e më të pakta dhe sa më shumë kalon koha aq më shumë besoj se do të reduktohen duke parë brezat e rinj të mjekëve stomatologë që kanë kuptuar plotësisht konceptin e punës në ekip - që e aplikojnë në klinikën e tyre - ose që dërgojnë pacientët në qendra ku operojnë fizioterapistë të përgatitur dhe në gjendje që t'i ndihmojmë të zgjidhin plotësisht problemin.

Uroj që ky artikull të jetë një stimul dhe një ftesë për rritje profesionale reciproke me dëshirën e vetme dhe të përbashkët: shërimi i pacientit tonë.

Nën kujdesin e: David Di Segni, fizioterapist i Mdm fisioterapia

Përktheu: Erjola Taga