Të moshuarit, humbja e dhëmbëve ndikon në kapacitetin konjitiv

Të humbësh dhëmbët mund të favorizojë në moshë të avancuar fillimin e deficiteve konjitive dhe demencës. Bëhet fjalë për një temë të trajtuar gjatë Kongresit Kombëtar CDUO - Kolegji i Docentëve Universitarë të Disiplinave Odontostomatologjike, ku është theksuar edhe rëndësia e kurave stomatologjike dhe se si në realitet këto lihen pas dore. Sipas një hetimi të Istat, tetor 2017, në Itali vetëm 45.8% e popullsisë mbi 15 vjeç, kuron shëndetin vetjak oral, përqindje që zbret akoma më shumë deri në 29% për ata mbi 75vjeç. Të dhënat nën mesataret europiane janë në tendencë të kundërt me politikat e plakjes aktive të mbështetura nga Organizata Botërore e Shëndetësisë.

Edentulia dhe deficiti konjitiv
Në moshën e tretë kurimi i dhëmbëve neglizhohet, si nga prania e sëmundjeve të tjera që heqin vëmendjen nga problemi dentar, si nga ndikimi i disa kategorive të barnave si edhe për faktorë ekonomikë. Sëmundjet periodontale janë të shkaktuara nga një higjienë e dobët orale që te të moshuarit thjeshtohet nga probleme të shikimit dhe dridhje të vogla të duarve.
Mungesa e dhëmbëve ose edentulia gjithashtu nuk lejon që të ushqehemi në mënyrën e duhur dhe është e lidhur me disfaginë, pra vështirësi në gëlltitje dhe mungesë nutricionale në veçanti të vitaminave dhe ushqimeve antioksidante.
Të përtypesh në mënyrën e duhur është e rëndësishme pasi përtypja favorizon fluksin e gjakut në tru dhe reagon pozitivisht te memoria, te të mësuarit dhe në ruajtjen e funksionit konjitiv. Humbja e dhëmbëve posterior dhe kështu një përtypje e reduktuar përfaqëson një faktor risku për zhvillimin e deficitit konjitiv, demencës dhe depresionit. Malokluzioni i shkaktuar nga parregullsia apo mungesa e dhëmbëve mund të çojë në fund në dhimbje muskulo-skeletore, nënvizojnë mjekët, pa harruar aspektin psikologjik të nxitur nga edentulia, që çon në një izolim dhe në humbjen e jetës sociale.

Stefania Cifani

Përktheu: Erjola Taga