Parandalimi i përhapjes së infeksioneve në klinikën dentare

Vëmendje edhe ndaj viruseve dhe baktereve “banale”

Nga Davis Cusotto

Uljet e temperaturave gjatë këtyre ditëve, pas një të nxehti të zgjatur, na kujtojnë ardhjen e stinës së gripit, por në klinikën stomatologjike infeksionet e përziera janë gjithnjë në sulm. Pra protokollet e parandalimit nuk kanë stinë dhe duhet të zbatohen gjatë gjithë vitit duke i kushtuar vëmendjen jo vetëm sallës operative dhe instrumenteve të përdorimit klinik.

Qëllimi është që të mbrohet personeli, pacientët, vizitorët në përgjithësi jo vetëm nga kërcënimet e dukshme të patogjenëve të transmetueshëm nëpërmjet rrugëve hematike (Virusi i Hepatitit, HIV) po edhe nga infeksionet e organizmave multirezistentë si Staphylococcus aureus meticilino-rezistent, Entero Coli, Noro Virus si edhe virusi i ftohjes.

Salla e pritjes është një zonë e klinikës që zakonisht rri plot me njerëz dhe ka nevojë për një vigjilencë të lartë. Pacientët që mbartin virusin e gripit ose të ftohjes, për shembull, mund të përhapin në mënyrë të pavullnetshme bakteret dhe të vënë në risk pacientët e tjerë dhe personelin në momentin në të cilin hyjnë në një klinikë dentare.

Pothuajse 80% e sëmundjeve infektive përhapen me anë të prekjes, duke ofruar mundësi të panumërta të kontaminimit të kryqëzuar ndërmjet zonave të ndryshme të klinikës. Me këtë temë është marrë një artikull i botuar së fundmi në revistën American Journal of Infection Control.

Pastrimi me kujdes dhe çdo ditë i sipërfaqeve dhe dezinfektimi i të gjithë klinikës janë të domosdoshëm për të parandaluar përhapjen e sëmundjeve, sidomos për shkak të viruseve të rrezikshme dhe agjentëve patogjenë që mund të mbijetojnë në sipërfaqe të forta për periudha të gjata kohore. Dezinfektantët në treg janë të shumtë, por duhen zgjedhur ato që janë gati për përdorim, që kanë një përmbajtje të ulët alkooli, që përmbajnë pak surfaktantë, kripëra të amonit kuaternar dhe/ose peroksid hidrogjeni.

Ata duhet të kenë një kohë të shkurtër kontakti dhe veprimi i tyre duhet të shoqërohet me ndryshimin e ajrit të ambientit. Ata përdoren pasi janë veshur pajisjet e mbrojtjes individuale. Ekipi inkurajohet edhe për sjellje të shëndetshme virtuoze si larja e kujdesshme e duarve, përdorimi i maskës, zëvendësimi i shpeshtë i përparëseve.

Pas çdo pacienti duhet të pastrohen sipërfaqet e ambientit të pambrojtur nga barrierat. Vëmendje e veçantë i kushtohet edhe dorezave të dyerve, çelësave të dritave, aparaturave radiologjike, tastierës dhe mouse-it të kompjuterit, kontenitorëve të materialeve dentare, dorezave të sirtarëve, stilolapsave, telefonit.

Përktheu: Valbona Spahia