Konsenti i informuar i pacientit të moshuar

Metoda për të vlerësuar aftësinë vendimmarrëse

Concezione Tommasino, Carlo Petrini

Një pikë kryesore e raportit mjek-pacient, edhe përpara detyrimeve ligjore dhe deontologjike, është nevoja që pacienti të kuptojë terapinë e propozuar. Shpjegimi në mënyrë të qartë nuk garanton gjithmonë që na kanë kuptuar, sidomos kur kemi përballë persona të moshuar, të cilët ndoshta janë me probleme. Pra është thelbësore që të arrijmë të kuptojmë nëse pacienti ka kuptuar vërtetë apo duhet t'ia shpjegojmë sërish.

Vlerësimi i kompetencave/aftësive te popullsia gjeriatrike mund të jetë një detyrë komplekse dhe paraqet shumë sfida etike dhe ligjore. Aftësia e një individi të moshuar për të marrë vendime mjekësore duhet të konsiderohet gjithmonë e vlefshme, pavarësisht moshës.

Por kur personi nuk është në gjendje të pranojë apo të refuzojë një trajtim, nuk mund të kuptojë dhe të mbajë mend informacionet e marra ose nuk mund t'i përdorë ato në fazën vendimtare atëherë mjeku duhet të vlerësojë aftësinë e tij apo të saj përmes instrumenteve objektive, sepse konsenti i marrë nga një pacient që nuk mund të marrë vendime nuk është i vlefshëm ligjërisht.

Instrumenti i vlerësimit të aftësive vendimmarrëse duhet të jetë i thjeshtë dhe me përdorim të lehtë, objektiv dhe i replikueshëm; duhet të administrohet për një kohë të shkurtër dhe mundësisht të mos kërkojë përgatitje formale të kujdesit shëndetësor.

Plakja konjitive është e vështirë për t'u përkufizuar dhe për t'u matur: metodat e skrinimit që përdoren më shpesh për të vlerësuar aftësitë vendimmarrëse janë në qendër të punimit të publikuar në revistën Dental Cadmos në Shtator (Informed consent in elderly people: assessing the patient's decision-making capacity) dhe janë si në vijim: MacArthur Competence Assessment Tool for Treatment (MacCAT-IT), Aid to Capacity Evaluation (ACE) dhe Mini Mental State Examination(MMSE). Autorët nëpërmjet një rishikimi të literaturës gjejnë pikërisht këtë të fundit si "instrument klinik më të përshtatshëm".

MMSE në fakt ka përdorim të thjeshtë, nuk kërkon një formim specifik, mund të administrohet në më pak se 10 minuta, është një testim objektiv dhe përdor pikë lehtësisht praktike. Testi është strukturuar me 30 pyetje që i referohen zonave të ndryshme konjitive; pikët vihen nga 0 deri në 30: një rezultat i MMSE nga 0 deri në 17 lidhet me një mundësi të lartë të paaftësisë vendimmarrëse; rezultati i pikëve nga 18 deri në 23 tregon një deficit të lehtë konjitiv, ndërsa rezultati i pikëve nga 24 deri në 30 redukton në mënyrë të konsiderueshme mundësinë e humbjes së autonomisë vendimmarrëse.

Te pacientët me një sistem të ulët pikësh të MMSE, që sugjeron mundësinë e mungesës së aftësisë vendimmarrëse, do të nevojitet që konsenti për procedurat mjekësore të jepet nga një kujdestar ligjor ose nga një administrator mbështetës, sipas ligjeve dhe juridiksionit të vendit përkatës.

Kriteret e rëndësishme për të vlerësuar aftësinë vendimmarrëse të pacientit sipas metodës së MacArthur Competence:

Assessment Tool for Treatment (të modifikuar nga Grisso dhe Appelbaum)

Përktheu: Valbona Spahia

Për të votuar duhet të vendosni kredencialet tuaja në Medikey

Interesant ( 70 votim / mesatar 3 )