Telefoni smart në klinikë gjatë trajtimeve

Një studim anglez heton “fuqinë shpërqendruese” të tij gjatë seancave

Nga Figini Lara

Futja e telefonave smart në sektorin mjekësoro-shëndetësor ofron avantazhe të shumta, në veçanti në fushën e të mësuarit klinik dhe i mundëson mjekëve dhe profesionistëve shëndetësorë një akses të shpejtë dhe të lehtë ndaj burimeve shkencore të dobishme për momentin për të marrë vendime për sa i përket trajtimit më të mirë që duhet ndjekur në rastin specifik.

Përfaqëson kështu një ndihmë diagnostikuese dhe për menaxhimin e dokumentacionit dhe arkivimit klinik nëpërmjet fotokamerave dhe funksioneve video. Megjithatë ka dhe efekte negative që mund të kompromentojnë sigurinë e pacientëve për sa përket mbajtjes së telefonit smart në sallën operative sigurisht pasi përfaqëson një element të fortë shpërqendrimi për mjekët.

Pra është e nevojshme që të përcaktojmë një protokoll të qëndrueshëm dhe politika formale që të disiplinojnë përdorimin e përshtatshëm të këtyre instrumenteve.

Por sa dentistë ka që e mbajnë celularin e tyre ndezur në sallën operative? Sa i fuqishëm është "roli shpërqendrues" i telefonit smart në klinikën stomatologjike dhe sa vë në risk sigurinë e pacientëve?

Tipologjia e kërkimit dhe mënyra e analizimit
Në një studim të publikuar në British Dental Journal në gusht 2018, trajtohet kjo tematikë. Autorët i kanë dërguar një pyetësor me pyetje të mbyllura dhe të hapura një kampioni prej 216 dentistësh në veri-perëndim të Anglisë midis vitit 2015 dhe 2017.

Përgjigjet e përftuara janë analizuar nga tetë revizorë të pavarur.

Rezultate
49,5% e dentistëve (107) është përgjigjur dhe ka ridërguar pyetësorët e plotësuar. 105 të intervistuar ishin dentistë të përgjithshëm, dy ishin dentistë spitalorë. Midis të intervistuarve, 82,2% ka deklaruar se e mban telefonin smart në sallën operative; ndër ta 88% afirmon se e mban në modalitet silent (pa zile). Të intervistuarit kanë deklaruar se marrin mesatarisht tre mesazhe, katër e-maile dhe një telefonatë për seancë. 40,9% nuk e vë re nëse ka marrë një mesazh, 53,4% një e-mail dhe 37,5% një telefonatë, ndërsa 50,1% ka deklaruar se ndërpret seancën për t'iu përgjigjur mesazhit të shkruar, 46,6% një e-maili dhe 62,5% një telefonate.

Ndër të intervistuarit 61,7% është shprehur i bindur se nëse e mban telefonin në sallën operative të shpërqendron, 20,7% ka deklaruar se telefoni smart nuk duhet të lejohet në sallën operative për asnjë motiv, ndërsa 24,1% ka deklaruar se duhet të pranohet vetëm nëse është pa zile dhe larg syrit. Në fund, 16,4% ka deklaruar se i duket e drejtë që të përdoren por jo përballë pacientëve.

Konkluzione
Nga të dhënat e studimit rezulton se 88% e të intervistuarve ka akses ndaj telefonit të tij smart në sallën operative ndërsa punon me pacientin pavarësisht se 61,7% e konsideron një shpërqendrim nga detyrat klinike. Për të ruajtur sigurinë e pacientëve dhe për të shmangur shpërqendrimet për profesionistin shëndetësor - që mund të çonin në gabime klinike - është e rekomandueshme që çdo dentist të ketë një protokoll që të rregullojë përdorimin e telefonit smart, duke u fokusuar në sigurinë e pacientëve duke shmangur përdorimin e këtyre instrumenteve gjatë seancave për sa i përket shpërqendrimit të fortë.

Implikime klinike
Nëse nga njëra anë avantazhet e teknologjisë celulare për të ndihmuar procesin vendimmarrës klinik, edukimin dhe komunikimin mjek/pacient dhe midis kolegëve janë të pamohueshme, gjithashtu nuk mund të lejohet që teknologjia të shkaktojë një shpërqendrim në detyrat klinike dhe të reduktojë sigurinë e pacientëve.

Për më tepër:
Wright S, Crofts G, Ucer TC, Speechley SD. Dentists' perceptions of smart phone use in the clinical environment. British Dental Journal 2018;225(4):320-4.

Përktheu: Erjola Taga