Dhëmbë inteligjentë

Nga Adamo Calatroni

Ideja nuk është diçka e re: futja e një pajisje të vogël që është në gjendje të lëshojë medikamentin në mënyrë të vazhdueshme dhe të kontrollueshme në bazë të nevojave terapeutike brenda një kurore ose një dhëmbi artificial.
Nuk janë të pakta vështirësitë teknike por tani duket sikur zgjidhja është gjetur dhe është paraqitur në një aplikim për të marrë patentën nga një grup studiuesish, duke përfshirë edhe disa italianë nga Universiteti i Palermos. Nëse në fillim mendoni se të zgjidhësh këtë çështje është diçka e çuditshme, mjafton të kujtoni futjen në treg së fundmi të strishave që janë propozuar kundër osteoartritit dhe sëmundjes së udhëtimit, për zemrën dhe për të ulur tensionin, për zonjat në menopauzë dhe për ata që duan të lënë duhanin.

Me sistemet transdermike, gjetja e re e studiuesve siçilianë shpërndan atë administrim gradual që tashmë në vetvete përbën një avantazh të menjëhershëm mbi shumë nga medikamentet e marra nga goja në një ose më shumë doza ditore.
Kjo shpikje është fryt i një projekti që është financuar nga Komisioni Europian me tre milionë euro dhe është kryer nga një ekip ndërkombëtar pune që përfshin studiues jo vetëm italianë por edhe spanjollë, zvicerianë, gjermanë, polakë dhe izraelitë. Pikërisht në Izrael, aparatura e vogël elektronike është kaluar nëpërmjet një faze eksperimentimi dhe është "pagëzuar" me emrin IntelliDrug, që është edhe emri i të gjithë projektit dhe që shpreh qëllimet: për një modalitet më inteligjent që të merren medikamentet. Intelli-Drug përfshin një rezervuar të vogël, një mekanizëm lëshimi, një sistem të sofistikuar kontrolli, mikro-sensorë dhe mikro-aktivizues. Të gjitha këto janë instaluar në kavitetin oral të pacientit në mënyrë të thjeshtë dhe joinvazive dhe medikamenti i lëshuar mund të absorbohet nga mukozat e gojës ose ato të gëlltitjes.

Por çfarë e bën kaq të veçantë që të kandidojë për të zëvendësuar pilulat dhe injeksionet?
Me shumë mundësi fleksibiliteti. Në fakt do të jetë e mundur që të përcaktohet dozimi në mënyrë shumë të saktë, duke variuar nga koha, duke e ndërprerë dhe rifilluar më pas sipas nevojave specifike të pacientit dhe të zhvillimit të gjendjes së tij/së saj shëndetësore. Prandaj duket ideale për ato pacientë që janë të shpërqendruar dhe harrojnë dozat apo ngatërrojnë oraret, ndonjëherë duke kompromentuar suksesin e një terapie. Në këtë rast është vetë IntelliDrug që merret me gjithçka dhe nëpërmjet një sistemi kontrolli në largësi, paralajmëron pacientin se kur është momenti për të mbushur rezervuarin. Ndërmjet zonave të në cilat aplikimi indikohet më shumë, shpikësit e IntelliDrug listojnë varësitë toksike, hipertensionin, hipertiroidizmin, Alzheimerin.

Por kur do të dalë në treg kjo mikro-aparaturë?
Giuseppina Campisi, profesoreshë e asociuar në departamentin e Shkencave stomatologjike në Universitetin e Palermos, ka thënë që dëshiron që të zgjerojë eksperimentimin e kësaj teknologjie të re në disa medikamente të ndryshme dhe disa tipologji pacientësh si edhe të jetë në kërkim të një partneri komercial.

Përktheu: Valbona Spahia