Frika nga dentisti është më e madhe te personat që kanë flokë të kuq

Ankthi i pacientit lidhet me gjenin MC1R që është përgjegjës për ngjyrën e kuqe të flokëve

Nga Cosma Capobianco

Ajo që mund të duket si një legjendë urbane tashmë është vërtetuar: kush i ka flokët në ngjyrë të kuqe vuan nga një ankth më i madh nga dentisti dhe priret që t'i evitojë kurat. Më saktë personat që mbartin kromozomin 16 një variant të gjenit MC1R, që kodifikon një receptor të melanokortinës (hormoni që rregullon prodhimin e melaninës), tregojnë pikët më të larta në testet që matin ankthin.

Prova e fundit vjen nga një kërkim i publikuar në Journal of Endodontics të zhvilluar në 62 femra me flokë të kuqe në krahasim me 62 brune. Kërkuesit kanë matur edhe efektin e anestezisë me një testues elektronik të pulpës por ndërmjet dy grupeve nuk pati diferenca të rëndësishme. Një lajm i mirë ky për ata që duhet të kurojnë individët me rutilizëm (emri shkencor i ngjyrës së kuqe), edhe pse nuk është e sigurt nëse është një problem i përditshmërisë. Kërkimi konfirmon studimet e mëparshme, ndërmjet të cilëve ata që janë publikuar në Jada (Binkley CJ) dhe zgjeron listën e shqetësimeve për ata që i kanë flokët në ngjyrë të kuqerremtë pasi këto persona janë më të ekspozuar edhe ndaj riskut të melanomës dhe sëmundjes së Parkinson.

Përktheu: Valbona Spahia