Fytyra jonë zbulon gjendjen shëndetësore: Stereofotogrametria dhe të rejat e analizës antropometrike edhe në sektorin dentar

Analizat sasiore të fytyrës së njeriut kanë pasur gjithmonë shumë vëmendje nga ana e shkencëtarëve, mjekëve si edhe artistëve. Forma e fytyrës sonë analizohet me mjete matematikore, softuerë 3D si edhe analiza që mund të identifikojnë harmoninë muskolo-faciale dhe të studiojnë hap pas hapi zhvillimin kranio-facial dhe atë të dhëmbëve. Fytyra jonë transmeton jo vetëm se kush jemi por edhe sesi jemi dhe nëse jemi të shëndetshëm. Kështu mund të vlerësohen anomalitë ose modifikimet që kemi nga lindja apo që kemi pësuar me kalimin e viteve; mund të parandalohen ose të kurohen më mirë modalitetet e kurave për një mastikacion të saktë dhe mund të llogariten të dhënat që lejojnë përkufizimin se cilat fytyra janë më të shëndetshme dhe cilat janë zhvilluar mirë në ekuilibrin muskulo-skeletor.

"Analiza antropometrike", - thotë prof. Gianluca Tartaglia, i Clinica SST, - "luan një rol kyç në punën tonë dhe na lejon të bëjmë diagnoza të sakta edhe në lidhje me sindroma të ndryshme. Në fakt mund të vlerësojmë rritjen normale dhe anormale muskolo-faciale, të dhëmbëve dhe të pjesëve që lidhen me to. Kjo na lejon edhe të vlerësojmë se cilat janë trajtimet më të përshtatshme, qoftë kirurgjikale qoftë ortodontike, për çdo pacient si edhe të vlerësohen rezultatet. Në ditët e sotme ka një shumëllojshmëri teknikash joinvazive që lejojnë analizat faciale me një ndërtim tredimensional në mbështetje të punës sonë stomatologjike siç janë skanimi me laser, ultratingujt, rezonanca magnetike, dixhitalizimi me kontakt dhe në fund stereofotogrametria.

Kjo e fundit është metoda më e saktë për diagnostikimin dhe kurimin e pacientëve. Kjo metodë lejon të merren imazhe të ndryshme të subjektit nga kënde të ndryshme dhe njëkohësisht me një softuer të dedikuar dixhital në 3D që riprodhon imazhin e pacientit. Shpejtësia e marrjes së të dhënave redukton problemin e lëvizjeve të mundshme të individit dhe nuk ka nevojë për një kontakt direkt me sipërfaqen faciale, gjë që eviton edhe modifikimet e indeve të buta që mund të shkaktojnë gabime të matjes së saktë.

Stereofotogrametria është një metodë e zbulimit optik e bazuar në përdorimin e kopjeve të përshtatshme të fotogramëve relativë me të njëjtin subjekt, duke lejuar një ndërtim të saktë tredimensional. Është një metodë shumë e besueshme që analizon çrregullimet kranio-faciale me saktësi.
Avantazhet e sistemeve të stereofotogrametrisë janë për shkak se nuk është i domosdoshëm kontakti me sipërfaqen e lëkurës së pacientit, por edhe për shkak të analizës së menjëhershme. Është një instrument diagnostikimi, dokumentimi klinik dhe simulimi terapeutik shumë i besueshëm.

Është e lehtë që të imagjinojmë ndihmën që mund të japin zhvillime të fundit të softuerit të imazherisë mjekësore, duke filluar nga vetë platforma tredimensionale, në aktivitetin tonë të përditshëm si stomatologë dhe si kirurgë plastikë, që do të na lejojë gjithnjë e më shumë të mund të parashikojmë edhe si dhe në çfarë mase trajtimi ynë do të inserohet në kontekstin morfo-funksional të pacientëve."

Në analizat mjekësoro-klinike përdoren tre kritere: kriteri antropometrik (matjet direkte), statik (me analizë dhe krahasim të masave të një individi në krahasim me mesataren e popullsisë) dhe funksional (kufizimet kinematike).

Stereofotogrametria nuk ka kundërindikime, nuk është invazive dhe është e shpejtë, ofron një cilësi më të mirë të imazheve të sipërfaqes faciale nga pikëpamje të ndryshme. Është një metodë jo vetëm e saktë por edhe që lejon përsëritjen e analizave dhe studimeve specifike në bazë të diferencave biologjike të pacientëve. Ky instrument është shumë i mirë për fëmijët, për personat me aftësi të kufizuara dhe për personat që janë të vështirë në marrjen e të dhënave muskolo-faciale.

Lidhja ndërmjet modelit dentar dixhital dhe imazheve 3D të fytyrës mund të lejojë mjekun që të analizojë marrëdhëniet ndërmjet indeve të buta dhe harkadave dentare, duke evituar sa më shumë që të jetë e mundur përsëritjen e rrezeve X. Mund të kryhen edhe vlerësime sasiore të morfologjisë labiale dhe peri-labiale si përgjigje ndaj ndryshimeve të morfologjisë dentare. Metoda të ndryshme për analizat tredimensionale janë zhvilluar dhe studiuar, por në përgjithësi, kosto e lartë e kufizon përdorimin e tyre në praktikën klinike.

Fytyra e njeriut pra paraqet pjesën më përfaqësuese të trupit dhe më karakterizuese të personit. Funksionet kryesore të organizmit, si respirimit, ushqyerja, fonacioni dhe pesë shqisat duhet domosdoshmërisht që të përdoren në këtë pjesë që të mund të shprehemi dhe të funksionojmë sa më mirë. Nëpërmjet kësaj zënë vend edhe veprimet më të rëndësishme të çdo qenieje njerëzore si njohja, shprehia mimetike dhe komunikimi social.

"Analizimi sasior i një fytyre", - vijon prof. Gianluca Tartaglia, - "është një procedurë që të gjithë ne e vëmë në përdorim çdo ditë, shpesh në mënyrë të pavetëdijshme. Në fushën mjekësore, shumë specialistë përmbushin të njëjtin lloj matjeje, duke përdorur teknika që për saktësi dhe kujdes pasqyrojnë kriteret e nevojshme shkencore. Në këtë mënyrë, kirurgët estetikë, maksilo-facialë, otorinolaringologët, stomatologët, kirurgët oralë, ortodontistët mund të dokumentojnë rastet klinike, qoftë duke i krahasuar mes tyre qoftë duke krahasuar imazhe të ndryshme të të njëjtit pacient, për shembull para dhe pas një kure të caktuar. Stereofotometria po revolucionon veçanërisht trajtimin stomatologjik. Imazhet luajnë një rol kyç duke filluar nga diagnoza, nga inkuadrimi nozologjik, nga komunikimi me pacientin, për të arritur më pas në dokumentimin e të gjithë dekursit mjekësoro-kirurgjikal, në të gjitha fazat e tij, nga ndërhyrja deri te follow-up. Një dokumentim vizual efikas do të jetë gjithnjë e më i përdorur, në fushën shkencore dhe atë të komunikimit, qoftë në raportin mjek-pacient, qoftë në raportin ndërmjet mjekëve."

Burimi: Odontoiatria33

Përktheu: Valbona Spahia