"Ju duhet të përmirësoni higjienën orale personale!"

Si t’ia komunikoni pacientit këtë pa rriskuar ankesën

"Të premten isha te një dentist që më tha: - Çfarë ke ngrënë sot, se duket sikur kemi hapur tubacionet e kanalizimeve të ujërave të zeza në Kalkuta!
Unë dua që të hap një ankesë për të. A është e mundur?"

Kjo ka qenë një pyetje e vendosur në Yahoo Answers disa javë më parë. Me shumë mundësi është një ekzagjerim, qoftë për fjalinë e thënë nga dentisti qoftë për reagimin por "takti" në komunikimin me pacientin për një situatë kritike është sigurisht një aspekt që duhet përballuar me shumë kujdes.

"Motivimi i një pacienti që të mbajë një higjienë orale të saktë, ilustrimi i një trajtimi që parandalon ekstraktimin e një ose më shumë elementeve dentarë apo bindja se është e nevojshme që të bëjnë një kontroll për një lezioni të dyshuar janë vetëm disa nga shembujt e lajmeve të pakëndshme që çdo ditë duhet t'i japim pacientit për shkak të raportit të besueshmërisë së trajtimit që na lidh me të," - shpjegon për Odontoiatria33 Davis Cussotto, dentist dhe bashkëautor i librit që ka shkruar në bashkëpunim me Erika Leonardi "Il passaparola per un dental team di successo" (EDRA Milano 2018).

"Stilet e komunikimit agresiv që janë në modë në ueb apo televizion" - vijon ai - "nuk duhet të gjejnë hapësirë në klinikën dentare që në fakt duhet të frymëzojë për këmbëngulje dhe për një ton të mirë në mënyrë që të lindë përhapja e fjalës dhe të largohen fjalët e këqija".
"Kur përballë një pacienti themi: Duhet të përdorni furçën interdentare për të pastruar këtë hapësirë interdentare", - shpjegon Cussotto - "mund të kemi një gradient efektesh që shkon deri tek indiferenca për të ndjekur këshillat. Suksesi i ndërveprimit i është besuar impenjimit të të dyja palëve: neve që kemi aktivizuar komunikimin e jemi të motivuar dhe bashkëbiseduesin tonë që mund të mos jetë i motivuar."

Për të kuptuar sesi mund ta përfshijmë, derisa të jetë receptiv dhe pjesëmarrës, Cussotto këshillon që mesazhi të shpërbëhet në dy aspekte kyçe: "ÇFARË" dhe "SI".

• Fjala "ÇFARË" i përket përmbajtjes (16 ka një frakturë radikolare dhe duhet ekstraktuar);
• Fjala "SI" i përket qëndrimit (pra kanalet e komunikimit jo verbal: zëri, postura, mimika, distanca etj.).
Fjalët (çfarë, si) mund të përfshihen kur harmonizohen shumë mirë me elementet e shumtë jo verbalë që i shoqërojnë.

Në vijim paraqitet një tabelë (që është trajtuar edhe në libër) e cila jep një skemë të këtij koncepti:

ÇFARË	1) FJALËT	- Përdorni terma që janë të kuptueshëm nga bashkëbiseduesi juaj dhe kufizoni përdorimin e termave shumë specifikë. - Ndërtoni fjali në mënyrë të thjeshtë pa nënrenditje apo bashkërenditje.
SI	2) ZËRI	- Përfshin: tonin, volumin, pushimet, artikulimin dhe intonacionin.
	3) TRUPI	- Shprehet me: mimikën e fytyrës (shikimi dhe buzëqeshja), gjestet, posturën, pozicionimin, veshjen, kujdesin ndaj personit, erërat/parfumet, prosemikën (distanca nga bashkëbiseduesi)

Doktor Cussotto ka dhënë edhe dy shembuj në lidhje me komunikimin e drejtpërdrejtë me pacientin:

1) Komunikimi efikas
Z./Znj. Xxxx (e shqiptuar qartë, me pushimet e duhura, buzëqeshje, kontaktin me sy, posturën e drejtuar nga bashkëbiseduesi), dhëmballa juaj në nofullën e sipërme ka një frakturë të rëndë në rrënjë: duhet hequr dhe zëvendësuar me një implant. Pacienti/pacientja nënkupton profesionalitet, kompetencë dhe pranon planin e trajtimit.

2) Komunikimi jo efikas
Z./Znj. Xxxx (e shqiptuar me zë të ulët, duke ngrënë fjalët, me dorën e majtë në xhep, duke mos e parë në sy dhe me një shprehi të vrenjtur), më duket se 16 është frakturuar... (shpjegim i gjatë me terminologji teknike, sikur dëshiron të bindë veten për diagnozën...) ... duhet të ekstraktohet ... Pacienti/pacientja nënkupton pasiguri, profesionalitet të ulët dhe me shumë mundësi nuk do ta pranojë planin e trajtimit të propozuar.

Përktheu: Valbona Spahia