Bashkëpunim apo antipati: çfarë lind nga mënyra jonë e komunikimit?

Disa këshilla

Nga Davis Cussotto

Motivimi i pacientit për të përdorur furçën interdentare apo motivimi i asistentes për të kryer mirëmbajtjen e një pajisjeje të kushtueshme është pjesë e rutinës së klinikave tona profesionale. Disa reflektime mbi dinamikat e komunikimit human, na ndihmojnë që të kuptojmë përse ndonjëherë mesazhet tona që i drejtohen pacientëve apo bashkëpunëtorëve tanë nuk kanë efektin e pritur. (cfr P. Watzlawick , la pragmatica della comunicazione umana, Astrolabio, Roma 1978)

Kështu del në sipërfaqe në mënyrë mbizotëruese tipi i marrëdhënies që vendoset apo që në mënyrë të vetëdijshme synohet të vendoset:
• marrëdhënie bashkëpunuese
• marrëdhënie antipatike (negative)

Për shembull: fjalët e thjeshta dhe të qarta, mund të marrin kuptime shumë të ndryshme në lidhje me komponentët jo-verbalë.

Mendoni për zërin: toni, volumi, intonacioni, pushimet. Me më shumë rëndësi janë komponentët që shprehen nga trupi: postura, veshja, shikimi, mimika faciale, gjestet dhe distanca (prosemika).

Nëse në ekipin e punës ka ndonjë mllef, përtej fjalëve të përdorura kjo del në pah nga komunikimi joverbal. Në dinamikën e ndërveprimeve janë mesazhet e trupit ata që kanë impakt më vendimtar: të njëjtat fjalë që shprehen me zë ose qëndrime të ndryshme, krijojnë mesazhe me ton dhe kuptim shumë të ndryshëm.

Një shembull i thjeshtë:
I drejtohem asistentes që po përgatitet të fillojë me një Pentamix përpara se të marrë një gjurmë komplekse: "Elena! Fillojmë. A është gjithçka gati?"

Në versionin e një komunikimi të mirë fjalët shoqërohen nga zëri me një ton të kënaqshëm dhe volum të përshtatshëm, pushimet e duhura, shikimi sy më sy, një buzëqeshje e sinqertë, posturë e relaksuar...
• indukton emocione të një përzemërsie dhe disponueshmërie si edhe vendos një marrëdhënie bashkëpunuese.

Në versionin e një komunikimi të keq: shikimi është i drejtuar diku tjetër, zëri është i ulët, toni është i prerë i tipit urdhërues, postura e ngurtë, (kuptimi i mesazhit i përket një "galaksie" tjetër)
• indukton emocion antipatie dhe mosmarrëveshjeje si edhe vendos një marrëdhënie antipatike.

Pasojat e mundshme janë dy: pasojat bien mbi rezultatin protetik dhe përveç kësaj pacienti arrin të perceptojë mllefin në ekipin e punës dhe mund të përhapë fjalë negative.

Përktheu: Valbona Spahia