Fshihet nga Netflix dokumentari që cilësonte trajtimet endodontike si shkaktar të kancerit

"Root Cause" është titulli i filmit hetimor që dëshironte të tregonte se trajtimet endodontike mund të shkaktojnë kancer, sëmundje të zemrës dhe patologji të ndryshme kronike dhe sugjerimi i dhënë është që të ekstraktohet dhëmbi në vend që të kurohet. Dokumentari, që është ende i disponueshëm në rrjet në platforma të tjera, është drejtuar nga regjisori australian Frazer Bailey.

Sapo ka dalë në Netflix, në janar 2019, për këtë dokumentar janë grumbulluar protestime nga ana e disa shoqatave amerikane të dentistëve dhe onkologëve, ndërmjet të cilëve ADA dhe AAE, që kanë ngritur problematikat mbi përmbajtjen, e cila do të vinte në risk shëndetin e qytetarëve nëse besojnë vizionin e paraqitur në këtë dokumentar. Sipas asaj që thuhet në website-in Open, argumentet e dokumentarit i referohen disa tezave të nxjerra para një shekulli, të cilat më pas janë kaluar dhe përgënjeshtruar plotësisht në vitet '50.

"Trajtimi i marrë në konsideratë nga Root Cause përveçse lehtëson dhimbjen e pacientëve, i lejon ata edhe që të eliminojnë bakteret që vijnë nga infeksionet pasuese," - komentojnë mjekët. Në këtë dokumentar jepen mendimet e tre "ekspertëve": stomatologut kanadez Weston Price dhe mjekët amerikanë Hal Huggins dhe Boyd Haley.

Ekspertët theksojnë se asnjë nga efektet anësore që paraqiten në film nuk rezultojnë në publikimet shkencore.

"Trajtimi kanalar është një procedurë që zhvillohet plotësisht nën përgjegjësinë e endodontit dhe në rastet në të cilat veprime të lehta ose sasi modeste të materialit kalojnë periodontium-in reagimet e organizmit janë gjithnjë të lidhura me procesin inflamator dhe kurrë me procesin e induktimit të një patologjie neoplastike," - thotë për Odontoiatria33, prof.. Massimo Gagliani, Profesor i Asociuar i Sëmundjeve Odonto-stomatologjike në Universitetin e Studimeve në Milano, Fakulteti i Mjekësisë, Kursi i Diplomimit në Stomatologji, Departamenti i Shkencave Biomjekësore, Kirurgjikale dhe Stomatologjike, Klinika Stomatologjike "Giorgio Vogel" dhe Drejtor shkencor i zonës stomatologjike në Grupin e redaksisë EDRA.

"Në të shkuarën," - vijon ai, - "janë supozuar ndërveprime me disa materiale si cementet endokanalare apo materialet që lidhen me to; janë përshkruar edhe efektet e mundshme mutagjene të induktuar nga kloroformina, një tretës që ndonjëherë përdoret për heqjen e gutaperkës në ritrajtime. Nuk kanë qenë të pakta teoritë që kanë përfshirë procesin e deaferentimit (heqja e fundit nervor të pranishëm në brendësi të kanalit radikolar dhe të pulpës së dhomës), të themeluara të gjitha mbi kritere dhe modele eksperimentale të diskutueshme që janë hedhur poshtë dhe janë deklasifikuar nga shkenca që ka kryer kërkime jo rigoroze." "Në fakt," - përfundon prof. Gagliani, - "po ta mendojmë mirë rreth 75% e popullsisë ka të paktën një dhëmb të trajtuar dhe nëse do niseshim nga ky raport për patologjitë onkologjike spitalet do ishin të mbushura aq shumë sa do t'i ngjanin një depoje ushqimore."

Përktheu: Valbona Spahia