Nga SIdP jepet alarmi për kohëzgjatjen e seancës së higjienës orale profesionale

Të rrezikshme seancat që kryhen për më pak se 45 minuta

Seanca e higjienës orale profesionale nuk është një procedurë kozmetike por një akt i vërtetë terapeutik dhe nëse nuk kryhet në mënyrë të saktë, mund të krijojë dëmtime.
Këtë e ka evidentuar dr. Loretta Bongiovanni, Higjieniste Dentare e SIdP duke kujtuar sesi një kontroll efikas i pllakës bakteriale paraqet në fakt mënyrën më të rëndësishme të parandalimit të sëmundjeve të dhëmbëve dhe gingivave. Higjiena orale profesionale pra është hapi i parë për kurimin e periodontitit, sëmundjes më të shpeshtë kronike të indeve përreth dhëmbëve.
"Seancat e higjienës orale," - këshillojnë nga SIdP, - "është mirë që të kryhen rregullisht, me një frekuencë që duhet të identifikohet sipas nevojës së çdo pacienti."

SIdP vë në dukje sesi duhen kryer seancat e higjienës orale dhe në veçanti mbi kohën që duhet shpenzuar për seancën e higjienës orale. Ky është një aspekt që është evidentuar gjithmonë si kritik edhe nga Sindikatat e stomatologëve kur flitet për terapitë me kosto të ulët.

"Seancat duhet të kenë parasysh kuadron klinike dhe në çdo rast nuk mund të marrin më pak se 45-60 minuta," - shprehen nga SIdP duke shtuar: "Shtyrja e seancës apo akoma më keq seancat e kryera me shpejtësi jo vetëm janë joefikase por edhe të dëmshme. Heqja e tartarit duhet të kryhet në mënyrë të kujdesshme, pa dëmtuar smaltin apo gingivat."

Dr. Bongiovanni kujton se është i nevojshëm edhe një vizion holistik i pacientit që duhet marrë në konsideratë në kompleks, sepse është detyra jonë që të instruktojmë sesi të ruhet sa më mirë rezultati i seancës së higjienës profesionale. Por edhe që është e rëndësishme të shpjegohet jo vetëm sesi do kryhet heqja e pllakës bakteriale në shtëpi, por edhe stilet e jetës dhe sëmundjet, siç janë duhanpirja dhe diabeti, mund të influencojnë në progresionin e periodontitit.

Përktheu: Valbona Spahia