Një studim "provon" se furça elektrike është efikase kundër periodontitit

Aimetti (SIDP): një instrument efikas i konfirmuar tashmë edhe nga kërkimet

Një konfirmim i ri për furçën elektrike është pohuar në lidhje me efikasitetin e këtij instrumenti për higjienën orale edhe për të luftuar periodontitin dhe për të ngadalësuar progresionin e problemeve gingivale.

Këtë e ka "certifikuar" një studim i publikuar në Journal of Clinical Periodontology, revista zyrtare e European Federation of Periodontology (EFP) të kryer nga Vinay Pitchika, nga Universiteti i Greifswald, në Gjermani. Studimi ka zgjatur 11 vjet dhe ka përfshirë 2.819 individë me periodontit në grada të ndryshme.

Kërkimi ka zbuluar se pacientët që përdornin furçën elektrike, me një gjendje të shëndetshme gingivale paraqisnin një humbje më të vogël të dhëmbëve të vlerësuar me 20% në krahasim me të tjerët dhe një reduktim të xhepave periodontalë.

Te pacientët me një periodontit në gradë më të rëndë, nuk janë vëzhguar diferenca të mëdha ndërmjet atyre që përdornin furçën elektrike dhe atyre që përdornin furçën manuale. Sipas kërkuesve kjo tregon sesi përdorimi i furçës elektrike lejon ruajtjen e një shëndeti të mirë të zgavrës orale duke ngadalësuar progresionin e sëmundjes periodontale.

"Ky punim konfirmon të dhënat që në literaturë janë duke u shfaqur vitet e fundit për efikasitetin e furçës elektrike në kontrollimin e pllakës bakteriale duke reduktuar si pasojë riskun e progresionit të periodontitit," - nënvizon për ANSA, Mario Aimetti, President i Shoqërisë Italiane të Periodontologjisë dhe Implantologjisë.

Përktheu: Valbona Spahia