Teknika ART vs SDF krahas alternativave të frezave për kurimin e kariesit te fëmijët

Nor. Mac.

Kur nuk kemi mundësi për të përdorur frezën, anestezinë apo materialet e mbushjeve një ndër teknikat dhe produktet që janë në dispozicion për të trajtuar kariesin te dhëmbët në situata jo të favorshme dhe me kosto të ulët është sigurisht teknika ART, një ndër teknikat më të përdorura sidomos në klinikat stomatologjike të pajisura me aparatura të fundit. Një alternativë mund të jetë edhe teknika e përdorimit të fluorurit të diaminës së argjendit (SDF).

Një kërkim i publikuar në Journal of Dentistry në korrik ka krahasuar dy teknikat (ART dhe SDF) për të vlerësuar se cila prej tyre është më efikase kur aksesi ndaj kurave është i limituar.

Për të kryer kërkimin janë marrë në konsideratë 68 pacientë të vegjël nga Rio de Janeiro me karies në sipërfaqet okluzale të molarëve të qumështit, duke i trajtuar me SDF dhe ART e duke i ndjekur për 12 muaj. Kërkuesit kanë krahasuar efikasitetin e trajtimeve duke kuantifikuar kohën e nevojshme për t'i kryer ato, kariesin e trajtuar dhe faktorë të tjerë. Trajtimi përfshinte edhe higjienën orale dhe rekomandimet dietetike. Kërkuesit kanë zbuluar se koha mesatare e trajtimit për një dhëmb me SDF ka qenë 6,97 minuta në krahasim me 13,88 minuta për ART. Megjithatë, autorët kanë vënë re se SDF është më e thjeshtë që të aplikohet në krahasim me ART dhe mund të kryhet nga një dentist i përgjithshëm.

Proporcioni i dhëmbëve me lezionet e parandaluara për 12 muaj ishte 0,89 (55 nga 62) në grupin SDF dhe 0,96 (43 nga 45) në grupin ART.

Sipas autorëve teknika SDF është më e mirë në krahasim me ART, veçanërisht kur aksesi ndaj trajtimit është i vështirë, duke zbuluar se "varen më pak nga aparaturat stomatologjike specifike dhe nga aftësia dhe formimi i profesionistit dhe duhet pothuajse gjysma e kohës për ta përfunduar."

"SDF," - kanë përfunduar autorët, - "kërkon shumë më pak kohë dhe ka rezultate analoge me teknikën ART në parandalimin e lezioneve të kariesit dhe nuk prodhon te pacienti ankth, efekte anësore, duke dhënë një perceptim estetik duke përmirësuar si pasojë cilësinë e jetës."

"Këto teknika," - thotë profesoreshë Laura Strohmenger, drejtoresha e Qendrës OBSH në Milano, - "janë me siguri një ndihmë për stomatologët që ofrojnë shërbimet e tyre në zona të pazhvilluara të Planetit, por mund të jenë një zgjidhje për të kuruar pacientët tanë të vegjël që kanë frikë nga freza."

"Vite më parë dr. Jeniffer Sardo Infirri, zëvendës drejtoreshë e OBSH-së në Gjenevë, më përfshiu në një projekt stomatologjik të komunitetit të parandalimit oral në Lampedusa. Për 5 vjet po përdorim teknikën SDF te dhëmbët e fëmijëve me moshë 6 vjeç me probleme kariesi dhe rezultatet ishin fantastike. Besoj se tashmë limiti i vërtetë i përdorimit të fluorurit të diaminës së argjendit është vështirësia për ta gjetur atë në treg.," - përfundon ajo.

Përktheu: Valbona Spahia