Pacienti modern ka nevojë për një... Avatar

Nga Debora Bellinzani

Si vallë mund ta imagjinojmë klinikën dentare të së ardhmes? Një hipotezë vjen nga Shtetet e Bashkuara: është e mundur që në një kohë jo shumë të largët pacienti i ulur në poltron të vendosë syze që kanë një ekran për ta shpërqendruar nga stimujt e mundshëm të dhimbshëm. Një eksperimentim i ri nga JADA ka vlerësuar në fakt efikasitetin "e zhytjes" në realitetin virtual të një videoloje gjatë procedurave të pastrimit të gurëzave dhe lëmimit të rrënjës duke zbuluar se efektet e tij mund të përkufizohen si "analgjezikë".

"Imagjinoni sikur jeni duke ecur në një kopsht dhe po eksploroni çdo kënd të tij duke zgjedhur se ku të shkoni: kjo është ajo që kemi kërkuar të bëjmë virtualisht me 38 pacientë që kanë pranuar të eksperimentojnë teknika të reja për të lehtësuar shqetësimin dhe dhimbjen që lidhen me trajtimet e pastrimit të gurëzave dhe lëmimit të rrënjës," - përshkruan Robert Skillicorn, docent në departamentin e periodontologjisë në Case Western Reserve University School of Dental Medicine në Cleveland, në Shtetet e Bashkuara. "Sapo vendosen syzet nëpërmjet të cilave janë shfaqur pamjet, pacientët kanë mundur të zhyten në botën virtuale duke lëvizur dhe ecur apo fluturuar, nëpërmjet alter egos së tyre virtuale apo Avatarit, në versionin e simuluar të kopshtit botanik të Second Life, duke zgjedhur rrugët që duan të marrin dhe se cilëve elemente të këtyre mjediseve t'i afrohen, apo duke dëgjuar tinguj relaksues që vijnë nga kopshti si për shembull zhurma e ujëvarave dhe cicërimat e zogjve."

Secili nga vullnetarët ka mundur ta krahasojë shpërqendrimin për shkak të realitetit virtual me atë të stimuluar nga projektimi i një filmi nëpërmjet të njëjtave syze ndërkohë që stomatologu kryente trajtimin në një tjetër kuadrant të zgavrës orale dhe ka mundur të shprehë preferencën e tij.
"Pjesa më e madhe e pacientëve ka afirmuar se preferon realitetin virtual, një argëtim që në fakt kërkon ndërveprim dhe përfshirje më të madhe në krahasim me shikimin e një filmi: ata kanë deklaruar se kanë perceptuar më pak dhimbje, më pak ndjesi shqetësimi dhe se i kanë kushtuar më pak kohë mendimeve për dhimbjen," - vijon docenti, - "shpjegimi i këtij përjetimi është hasur në një studim të publikuar në Neroreport, që kishte përdorur rezonancën magnetike për të studiuar efektet e realitetit virtual mbi trurin duke zbuluar se ai mund të zvogëlojë aktivitetin cerebral të zonave të caktuara për perceptimin e dhimbjes dhe të ketë një veprim në të gjitha efektet analgjezike."

Shpërqendrimi dhe ndjesia e relaksimit që realiteti virtual arrin të krijojë kanë efekte që mund të maten menjëhershme dhe në krahasim me trajtimin e kryer gjatë shikimit të një filmi ose pa asnjë shpërqendrim, ruan vlerat më të ulëta të presionit të gjakut dhe më së shumti ngadalëson frekuencën e rrahjeve të zemrës. "Nëse kjo është ajo që realiteti virtual arrin të sigurojë në një eksperiment, mund të supozojmë se në klinikën stomatologjike të së ardhmes, ku pacienti mund të zgjedhë se me cilin mjedis dhe personazhe dëshiron të ndërveprojë ose nëse preferon të shohë një film, efekti analgjezik i shpërqendrimit mund të jetë edhe më i qëndrueshëm."

Përktheu: Valbona Spahia