Mbushjet: jetëgjatësia e tyre nga pikëpamja e stomatologëve

Nga Debora Bellinzani

Për të ditur se cila mbushje është më e mirë për një element të caktuar duhet njohur kapaciteti i vërtetë i jetëgjatësisë së tyre. Por pikërisht kjo karakteristikë nuk është e lehtë që të vendoset, sepse varet nga shumë faktorë: gjerësia e kavitetit, pozicioni në harkadën dentare, tipi i materialit që është përdorur për mbushje, mosha e pacientit dhe mosha e stomatologut (sepse edhe nga kjo varen aftësitë e tij).
Pavarësisht kësaj vështirësie nga studimet e fundit dalin të dhëna për jetëgjatësinë mesatare që mund të përmblidhen nga 6 deri në 20 vjet për mbushjet në amalgamë dhe nga 5 deri në 10 vjet për ato me materiale kompozitë. Sidoqoftë ky është vetëm një vlerësim që përfshin periudha mjaft të gjera: për të kuptuar se cilat janë bindjet që stomatologët kanë për jetëgjatësinë e mbushjeve dhe sesa zgjasin ato në të vërtetë sipas grumbullimit të të dhënave në dispozicion, Giornale dell'Odontoiatria ka bashkuar rezultatet e dy studimeve mbi kohëzgjatjen e mbushjeve.

Sa zgjasin mbushjet sipas mendimit të stomatologëve? Kjo pyetje, që deri më tani nuk është bërë kurrë në studimet shkencore që i përkasin stomatologëve, i është drejtuar 328 profesionistëve finlandezë që falë përgjigjeve të tyre janë cilësuar si "optimistë" nga ana e autorëve të studimit. Në fakt nëse kampioni mund të konsiderohet përfaqësues i kategorisë së stomatologëve, duhet theksuar se stomatologët mendojnë se mbushjet e çdo lloji zgjasin më shumë se sa ndodh në të vërtetë. Studimi i publikuar në Acta Odontologica Scandinavica, ka marrë në pyetje më shumë sesa 300 stomatologë aktivë në qendra të kujdesit publik ose në klinika private. Sipas profesionistëve mbushjet e kryera te dhëmbët posteriorë në materiale kompozitë zgjasin në përgjithësi 9 vjet ndërsa ato në amalgamë mbijetojnë të paprekura për mesatarisht 18,7 vjet, - thotë Ulla Palotie, kërkuese në departamentin e kurave stomatologjike të City of Helsinki Health Centre, në Finlandë.
"Këto mesatare janë më të larta sesa vlerësimet ekzistuese, mbi të gjitha nëse mendojmë që individë të ndryshëm janë përgjigjur se mbushjet në amalgamë zgjasin përgjithësisht edhe më shumë se 30 vjet." Këto vlerësime përmbledhin përgjigjet specifike në lidhje me llojet e ndryshme të mbushjeve për të cilat profesionistët janë përgjigjur njësoj. "Vlerësimet për mbushjet në dhëmbët posteriorë, në pjesë mezio-okluzalo-distale, kanë qenë 18,3 vjet për llojin e mbushjeve në amalgamë dhe 8,6 vite për ato në materiale kompozitë; edhe në këtë rast, pikërisht për shkak të sipërfaqes së gjerë të mbushjes vlerësimet kanë qenë më të larta sesa ato që janë sugjeruar nga literatura," - vijon kërkuesja. "Përsa i përket pyetjes specifike në lidhje me jetëgjatësinë e mbushjeve me materiale kompozitë te një kavitet i klasës III te një inciziv, stomatologët kanë vlerësuar një kohëzgjatje me 10, 7 vite që ashtu si në rastet e tjera i kalon vlerësimet e pranuara." Disa kuriozitete që dalin nga analiza të fundit të të dhënave të studimit i përkasin në fakt diferencës ekzistuese ndërmjet përgjigjeve të burrave dhe grave apo ato ndërmjet personave që punojnë në sektorin privat dhe shtetëror. "Është shquar fakti se burrat kanë vlerësuar mbushjet në kompozitë te dhëmbët posteriorë si më jetëgjata në krahasim me gratë, ndërsa ato kanë konsideruar si më jetëgjata mbushjet në amalgamë dhe gjithashtu stomatologët në sektorin publik supozojnë se mbushjet në amalgamë zgjasin më shumë, ndryshe nga vlerësimi që kanë bërë kolegët e tyre të klinikave private." - përmbyll Palotie; - "Duke qenë se të dhënat e fundit janë të vështira për t'u interpretuar, mund të dalim në përfundimin e përgjithshëm që jetëgjatësia e të gjitha llojeve të mbushjeve është mbivlerësuar nga ata që i realizojnë në praktikën e përditshme, një impenjim më konsistent nga kërkuesit në arritjen e vlerësimeve realiste dhe një vëmendje më e madhe e profesionistëve në ndjekjen e të dhënave që kërkimi ka arritur mund të riekuilibrojë me siguri situatën e çekuilibruar të ditëve të sotme kundrejt një vizioni optimist.

Përktheu: Valbona Spahia