Stomatologët anglezë kundër Coca Cola Xmas Truck

BSPD: “Duhet të ndalohet konsumimi i pijeve me sheqer për fëmijët më të vegjël se 12 vjeç”

Gjatë këtyre viteve "Coca Cola Xmas Truck" është një mjet i njohur që në Mbretërinë e Bashkuar, simbolizon ardhjen e sezonit të festave, edhe falë xhiros së tij promocionale që ka nisur të premten dhe vijon në të gjithë vendin. Kamioni i kuq i Coca Cola në fakt, prek 19 qytete midis të cilave Manchester, Leeds, Newcastle dhe Londër, duke ofruar pije me gaz falas gjatë ndalesave.

Kundër kësaj iniciative që ka arritur në edicionin e saj të nëntë këtë herë ka dalë BSPD (British Society for Paediatric Dentistry) duke i cilësuar këto pije si të dëmshme.

Në emër të shoqërisë ka folur Claire Stevens, konsulente në Pediatrinë infantile të SSN britanike, e cila pohon se ky kamion ka si qëllim vetëm promovimin e konsumimit të Coca Cola dhe pijeve të tjera të grupit. Por të gjitha ato pije që ofrohen falas janë të dëmshme, edhe versioni "Zero sheqer" duke qenë se të gjitha njihen si shkak i erozionit, fenomen ky ndaj të cilit janë të ekspozuar veçanërisht fëmijët.
"Ne," - thekson Stevens, - "kemi dhënë paralajmërimin e PHE (Public Health England) sipas së cilit pijet me gaz nuk duhet të futen në dietën e fëmijëve."

Kjo ka marrë jehonë nga një publikim në Tweeter që është bërë nga BSPD ku thuhet se ndërkohë që kamionët festivë të Coca Cola shpërndajnë pijet e tyre të gazuara falas nëpër qytete, stomatologët kanë për detyrë që t'i rikujtojnë prindërve paralajmërimin e PHE, pra që pijet e gazuara nuk duhet të jenë të pranishme në dietën e fëmijëve. Por një zëdhënës nga Coca Cola është kundërpërgjigjur duke thënë se qarkullimi i kamionëve të kuq është para së gjithash një vend pushim argëtues në kulmin e periudhës festive: prej nga lindi edhe ideja për t'i ofruar njerëzve një kanaçe falas. "Ne do të vazhdojmë të ofrojmë kanaçe 'Zero Sheqer' falas, duke e ditur që 90% e pijeve tona do të përbëhet pikërisht nga versioni 'Sugarfree'. Dhe do e bëjmë duke respektuar politikën tonë që të mos i japim kanaçe fëmijëve nën moshën 12 vjeç, vetëm nëse janë të shoqëruar nga adultë dhe na e kërkojnë ata." - vijon zëdhënësi.

Ekskursionet e kamionëve të kuq janë ndaluar vitin e shkuar si pasojë e kundërshtimeve të atyre që nuk janë dakord me iniciativën në emër të shëndetit. Si pasojë, kompanisë multinacionale i është dashur që të reduktojë numrin e ndalesave me një të tretën: nga 38 që ishin në 2017 janë reduktuar në 24 një vit më vonë, si pasojë e kundërshtimeve për nivelin e sheqerit që është i pranishëm në pijet e Coca Cola dhe në ato të prodhuesve të tjerë që do të shkaktonin shtimin e diabetit dhe obezitetit infantil.

Një kanaçe nga 35 ml përmban 35 gramë sheqer, doza që do të pranoheshin vetëm për fëmijët nga 11 vjeç e lart.

Sipas BSPD, një pedodont kuron çdo vit qindra, për të mos thënë mijëra, dhëmbë me karies edhe te fëmijët 2 apo 3 vjeç. Sasia e sheqerit që duhet konsumuar për fëmijët nga 4 deri në 10 vjeç, sipas PHE, nuk duhet t'i kalojë 5 ose 6 kuba sheqeri çdo ditë kundrejt 13 që në të vërtetë përbëjnë mesataren. Kjo nënkupton një konsum, të llogaritur në fund të vitit, me rreth 4.800 kuba, pra më shumë se dyfishi i sasisë së rekomanduar.

Pijet me gaz përbëjnë pra një nga furnizuesit kryesorë të sheqerit në dietën e fëmijëve, më shumë sesa akulloret dhe budingu klasik të marrë së bashku.

Duhet shtuar që një konsumim i tepërt i sheqerit çon në shtim të peshës, obezitet dhe karies. Një e treta e fëmijëve që kanë mbaruar shkollën fillore janë mbipeshë ose obezë, ndërsa rreth një e katërta e atyre 5 vjeç vuan nga dhimbje dhëmbësh. Të dhëna të tjera të fundit zbulojnë se numri i fëmijëve 4 vjeç ose më të vegjël, që janë dërguar në klinika për t'ju nënshtruar ekstraktimeve është rritur pothuajse me një të katërtën në dekadën e fundit. Sipas të dhënave të ofruara nga Fakulteti i Kirurgjisë Stomatologjike të Royal College of Surgeons (RCS), këtij grupi i përkisnin 9.206 ekstraktime në dyvjeçarin 2015-2016 dhe 7.444 në 2006-2007.

Prindërit janë udhëzuar që sapo t'i dalin dhëmbët e qumështit fëmijës ta dërgojnë për vizitë në një klinikë. Sepse në këtë mënyrë ai do të familjarizohet me ambientin dhe do e njohë figurën e stomatologut i cili më pas do të informojë prindërit sesi mund ta parandalojnë kariesin dhe t'i këshillojë për problemet e mundshme që mund të ketë goja e fëmijës.

Përktheu: Valbona Spahia