Ushqyerja e gabuar: 44% e adoleshentëve kanë probleme me kariesin

Akuza mbi sheqerin! Sipas SIOI duhet të këshillohen prindërit që të sensibilizohen në lidhje me një ushqyerje të shëndetshme të fëmijëve.

Numri i fëmijëve dhe adoleshentëve me dhëmbë me karies është gjithnjë e më i madh. Kariesi është aktualisht një nga patologjitë kronike më të përhapura në të gjithë botën: si pasojë e dietës së pasur me sheqerna, higjienës së dobët orale dhe predispozitës së bartësit ndaj faktorëve predispozues.

Pikërisht për impaktin e konsiderueshëm që ka kariesi mbi cilësinë e jetës së pacientëve të vegjël, parandalimi është thelbësor duke u nisur nga zakonet e shëndetshme të ushqyerjes, duke filluar me shmangien e konsumimit të shpeshtë të ushqimeve dhe pijeve me sheqer, thekson presidenti i SIOI Luigi Paglia, i cili shton se sensibilizimi i prindërve për të bërë kujdes me sheqerin që është i pranishëm në dietën e fëmijëve, një edukim korrekt për shijen do të karakterizojë edhe zakonet e tij apo shëndetin kur të rritet.
Ata që janë obezë që në fëmijëri shpesh vijojnë të jenë të tillë edhe kur rriten: pra shtohet probabiliteti për të zhvilluar përpara kohe faktorët e riskut me natyrë kardiovaskulare (hipertensioni, sëmundjet koronarike, tendenca për infarkt) dhe gjendjet e metabolizmit të ndryshuar, si diabeti i tipit 2. Sipas OBSH - së (Organizata Botërore e Shëndetit) konsumimi i sheqernave të shtuar nuk duhet të kalojë 10% të nevojave ditore të fëmijëve me moshë nga 2 deri në 9 vjeç.

Në lidhje me temën e një ushqyerje të gabuar gishti i drejtohet sheqernave të shtuara, pra atyre që nuk janë një komponent natyral i ushqimeve por që janë shtuar nga industria ushqimore te lëngjet e frutave dhe pijet, por edhe te produktet e padyshimta si ushqimet e prepaketuara dhe gjysmë të gatshme (si kroketat e peshkut, krakers, buka për hamburger, proshuta e pjekur, salcat) për të përmirësuar shijen dhe konsistencën.

Sipas Organizatës Botërore të Shëndetësisë (OBSH) është mirë që të shmanget shtimi i sheqernave tek ushqimet e fëmijëve nën 2 vjeç dhe të kufizohet konsumimi i sheqernave të shtuar brenda 10% të nevojave kalorike ditore te fëmijët me moshë nga 2 deri në 9 vjeç. Shoqata Amerikane e Kardiologjisë (AHA) këshillon reduktimin e dozave duke e kufizuar sheqerin në një maksimum prej 25 gramësh në ditë (rreth 6 lugë çaji) te fëmijët e vegjël dhe ata me moshë nga 2 deri 18 vjeç dhe duhet eliminuar plotësisht te fëmijët nën 2 vjeç. Këto rekomandime kanë të bëjnë vetëm me monosakaridet (glukoza dhe fruktoza) dhe disakaridet (sakaroza) e shtuar tek ushqimet dhe pijet përveç sheqernave të pranishëm në mënyrë natyrale te mjalti, shurupet, lëngjet e frutave dhe koncentratet e lëngjeve të frutave. Këtu nuk përfshihen sheqernat e pranishëm te frutat e freskëta apo perimet ose ato që janë të pranishme në mënyrë të natyrshme te qumështi, sepse nuk ka pasur prova për efekte anësore që lidhen me konsumimin e tyre.

Këshillat e SIOI për të reduktuar konsumimin e sheqerit te fëmijët
"Është thelbësore që të dimë të zgjedhim mirë ushqimin që duhet t'i japim fëmijës sonë," - thotë presidenti Paglia i cili specifikisht këshillon për prindërit që të:
• preferojnë ushqime të freskëta (fruta dhe perime të stinës jo të konservuara apo të bluara) dhe drithëra integrale;
• të reduktohet shumë konsumimi i pijeve me sheqer;
• të mos u shtohet sheqer ushqimeve;
• të mos konsiderohet sheqeri si "çmimi" që shpërblen fëmijën tuaj;
• t'i kushtohet vëmendje që të mos biem në grackën e sloganit "pa sheqerna të shtuar";
• të planifikohet pazari në mënyrë të vetëdijshme që të sigurohemi të mos blejmë produkte të pasura me sheqer;
• t'i jepet një shembull i mirë duke përshtatur fëmijët me zakonet tona korrekte ushqimore;
• t'i kushtohet shumë kujdes higjienës orale të fëmijës.

Përktheu: Valbona Spahia