Krijohet një chip dentar për personalizimin e trajtimeve

Lorena Origo

Një zbulim i bërë në Amerikë do mundet të lejojë dentistët që të identifikojnë materialet e restaurimit më të përshtatshme ndaj indeve dhe mikrobiomës orale të secilit pacient.
Një ekip kërkuesish i Universitetit amerikan të Oregon Health Sciences (OHSU), të drejtuar nga doktor Luiz Bertassoni, ka zhvilluar një "chip dentar" që hap dyert për zhvillimin e një stomatologjie gjithnjë e më të personalizuar në të cilën dentistët mund të identifikojnë materialet e restaurimit më të përshtatshme ndaj indeve dhe mikrobiomës orale të çdo pacienti.

Mini-aparaturat e këtij lloji tashmë janë zhvilluar me qëllim që të kryhen kërkime në lidhje me indet e mëlçisë dhe mushkërive, por është hera e parë që ideja është zbatuar në fushën stomatologjike, siç shpjegohet nga përgjegjësit e punimit në numrin e dhjetorit të kaluar në revistën Lab on a Chip.

"Mbushjet e kavitetit tashmë nuk janë aq efikase sa duhet, sepse zgjasin mesatarisht 5 - 7 vjet," - ka komentuar doktor Bertassoni. - "Kjo pajisje mund të ndihmojë që ky problem të zgjidhet falë një shikimi nga afër të asaj që po ndodh në kohë reale."

Chip - i është ndërtuar nga një fletë e hollë indi molar human të vendosur ndërmjet dy fletëve prej gome transparente të gdhendura me kanale të vogla nëpërmjet të cilave kalojnë likidet.

Pajisja, që funksionon si një imitim i sipërfaqes së një dhëmbi të vërtetë me një kavitet, lejon likidet dhe bakteret që të qarkullojnë ndërmjet shtresave të ndryshme të indit ndërsa kërkuesit observojnë në mikroskop sesi ndërveprojnë këto sipërfaqe. Në këtë mënyrë është e mundur që të vlerësohet sesi indet biologjike përgjigjen në mjedisin natyral ndaj agresioneve dhe trajtimeve të jashtme.

Përktheu: Valbona Spahia