OBSH dyshon për sigurinë e cigareve elektronike

Dokumenti i Organizatës Botërore të Shëndetësisë (OBSH) indikon risqet për shëndetin edhe tek ata që ekspozohen ndaj avullit të e-cig

Cigaret elektronike nuk janë të sigurta dhe janë të dëmshme për shëndetin, mund të dëmtojnë fetusin e janë të rrezikshme për zhvillimin e trurit tek adoleshentët. Ky është një pohim i OBSH-së në një dokument të publikuar në portalin e saj që ka ndarë edhe ekspertët në dy grupe.

E-cig shtojnë riskun e sëmundjeve kardiake dhe çrregullimeve pulmonare, është thënë në dokument dhe aty ku nuk është i ndaluar përdorimi i tyre duhet të rregullohet pasi edhe jo duhanpirësit janë të ekspozuar ndaj nikotinës dhe substancave të tjera kimike të dëmshme.
Organizata specifikon që lëngu që përmbajnë cigaret elektronike: "mund të djegë lëkurën dhe shkaktojë helmim nga nikotina nëse gëlltitet apo absorbohet" dhe që janë "veçanërisht të rrezikshme nëse përdoren nga adoleshentët sepse nikotina është problematike për trurin në zhvillim". Në këtë pikë është vënë re se ndërmjet 15.000 aromave të projektuara, shumë prej tyre janë menduar që të tërheqin të rinjtë, si për shembull aroma e çamçakëzit dhe pambukut të sheqerit.

Cigaret elektronike aktualisht janë të ndaluara në më shumë se 30 vende në të gjithë botën dhe sipas OBSH-së shtetet duhet të vendosin masa për të "ndërprerë promocionin". Kjo kërkesë është favorizuar nga pediatrët por ka ndarë në grupe specialistët që merren me ndihmimin e personave për të lënë duhanin. Në këtë aspekt OBSH kujton se për duhanpirësit nuk është gjithnjë i sigurt kalimi te cigaret elektronike, por varen nga sasia e nikotinës dhe substancave të tjera toksike që janë të pranishme te "lëngjet e shkrira" dhe që ekzistojnë produkte të tjera më të sigurta dhe të autorizuara siç janë ngjitëset që zëvendësojnë nikotinën.

"Paralajmërimi konfirmon gjëra që i dinim, por jemi të kënaqur që OBSH ka marrë një pozicion të qartë dhe të fortë," - shpjegon Rino Agostiniani zëvendës president i Shoqërisë Italiane të pediatrisë. E-cig, ashtu siç i kemi denoncuar disa herë, janë një instrument i lindur për të dekurajuar adultët nga duhanpirja por po shndërrohet në një instrument që po përdoret gjithnjë e më shumë nga të rinjtë edhe në moshën 11-13 vjeç, duke krijuar situata të mundshme varësie, ndoshta sepse ngjall më pak frikë te prindërit.

"Shpesh," - vijon specialisti, - "sidomos te lëngjet që nuk kalojnë në rrugë ligjore nuk është e qartë sesa nikotinë përmbajnë dhe ajo te gratë shtatzëna dëmton fetusin sepse përkeqëson shkëmbimet në nivelin e placentës."

Fabio Beatrice, drejtor i Departamentit të Otorinolaringologjisë dhe përgjegjës i Qendrës anti-duhan në Spitalin San Giovanni Bosco në Torino, ka një mendim tjetër: "Për ata që nuk arrijnë të lënë duhanin kalimi te cigarja elektronike përbën një avantazh klinik përball sigurive absolute për toksicitetin vdekjeprurës të duhanit të djegur. Kjo është treguar nga evidenca të shumta shkencore. Pra duhen ndarë politikat që tutelojnë jo duhanpirësit dhe të rinjtë nga politikat që ndihmojnë duhanpirësit."
Edhe Riccardo Polosa, drejtor i Qendrës së kërkimeve për reduktimin e dëmtimeve nga duhani në Universitetin e Studimeve në Katania shpjegon: "Është vënë re që nuk është nikotina ajo që shkakton kancerin por përzierja e substancave kancerogjene që çlirohen gjatë procesit të djegies së cigareve konvencionale. Pikërisht dje, edhe Qendra për Kontrollin dhe Parandalimin e Sëmundjes ka eliminuar rekomandimet për qytetarët amerikanë në lidhje me shmangien e cigareve elektronike siç është njoftuar pas çështjes Evali (sëmundja pulmonare që ka prekur disa përdorues të cigareve elektronike në SHBA). Në Evropë nuk është regjistruar asnjë rast dhe arsyeja është e thjeshtë: kontrollet te pajisjet dhe likidet janë shtrënguar aq shumë saqë nuk është fare e thjeshtë të hedhësh në treg produkte të këtij lloji.

Përktheu: Valbona Spahia