Dezinfektimi në klinikën dentare: çfarë duhet të mbajmë mend

Alarmi për Koronavirusin ka sjellë në vëmendjen tonë edhe tema të cilat duhet të jenë pjesë e rishikimit të përditshëm të një klinike dentare siç është parandalimi i infeksioneve të kryqëzuara apo i procedurave dhe detyrimeve që lidhen me sigurinë në fushën shëndetësore.

"Stomatologjia (publike dhe private) konsiderohet si një aktivitet me rrezikshmëri të lartë dhe risku më i madh për stomatologun është risku biologjik," - shpjegon Roberta Pegoraro, konsulente për procedurat organizative të klinikës dentare.

Nga pikëpamja strukturore në çdo klinikë dentare duhet të ketë një hapësirë për procedurat e dekontaminimit, dezinfektimit dhe sterilizimit, si edhe hapësira për ruajtjen e materialeve sterile. Hapësira duhet të parashikojë një ndarje të dallueshme ndërmjet materialeve të përdorura dhe atyre të pastra e procesi i sterilizimit duhet të kryhet në bazë të procedurave dhe protokolleve të shkruara.

Hapësira apo ambienti i sterilizimit, parashikon renditjen e pajisjeve që duke u klasifikuar si Pajisje Mjekësore, duhet t'i përgjigjen kërkesave të sigurisë që parashikon ligji.

Pajisjet e procesit të sterilizimit duhet të verifikohen në mënyrë periodike, në bazë të normave specifike të vendosura nga prodhuesi.

Instrumentet stomatologjike janë klasifikuar si "pajisje mjekësore" dhe prodhuesit e pajisjeve mjekësore të çdo klase kanë detyrimin që ti prodhojnë të sigurta dhe të japin instruksione përdorimi dhe mirëmbajtjeje që duhet të respektohen me përpikmëri.

Dezinfektantët janë klasifikuar si pajisje mjekësore dhe është parashikuar që të hidhen në treg pas disa provash efikasiteti. Edhe disa pajisje për mbrojtje individuale janë klasifikuar si pajisje mjekësore, për shembull dorezat, ato që mbrojnë nga risku biologjik sipas Normës 374 kalojnë provat e çarjeve dhe penetrimit e në këtë mënyrë garantojnë siguri për profesionistin, nëse përdoren në mënyrë koherente me instruksionet e përdorimit.

Dekontaminimi është procedura më e rëndësishme për ndërprerjen e zinxhirit të kontaminimit. Kjo procedurë është futur në vitet '90, me shfaqjen e HIV pasi kërkuesit kishin identifikuar se manipulimi i instrumenteve të kontaminuara, ishte kulmi i rrezikut të kontaminimit për profesionistët e shëndetit. Që nga ajo kohë është bërë e detyrueshme zhytja e instrumenteve të kontaminuara në një likid dezinfektues me efikasitet të provuar, përpara se të lahen si zakonisht.

Termodezinfektimi, që nuk është i detyrueshëm, lejon futjen e instrumenteve të kontaminuara direkt në një pajisje të posaçme (termodezinfektues) që parashikon fazën e dekontaminimit, larjen, shpëlarjen, tharjen dhe termodezinfektimin në 93°. Instrumentet që dalin nga termodezinfektuesi përgatiten për paketimin ose renditjen në autoklavë.

Autoklavat janë ndërtuar në mënyrë të tillë që ekziston një probabilitet më i ulët se 1 në 1 milion (10-16 është parametri që norma e produktit 130 60 parashikon për autoklavat me avull) që një mikroorganizëm të mbijetojë. Normat mbi funksionimin e autoklavave (që janë thjesht indikacione) parashikojnë që ato të verifikohen çdo ditë përpara se të përdoren (testi i vakumit + testi i arritjes së avullit te trupat me zgavra apo trupat porozë Helix ose Bowie & Dick), çdo cikël duhet të ketë një test kontrolli për efikasitetin e ciklit, çdo pako ka një material paketimi që ruan sterilizimin për një kohë të caktuar.

Në fakt është higjiena e ambientit që kushtëzon kohëzgjatjen e sterilizimit. Ambientet shëndetësore duhet të pastrohen me kujdes dhe sugjerohet që paketimet sterile të kenë një etiketë që lejon ngjitjen pas daljes nga autoklava ku janë sterilizuar, duke identifikuar datën në të cilën janë sterilizuar, numrin e ciklit dhe datën e skadencës.
Skadenca është lidhur me integritetin e paketimit, pajtueshmërinë me procedurat, trajtimin e duhur dhe mjedisin e ruajtjes. Disa pajisje mjekësore nuk mund të jenë subjekt i procesit të sterilizimit me avull, prandaj prodhuesit shkruajnë instruksionet e dekontaminimit në nivel të lartë ose llojin e sterilizimit që mund t'i nënshtrohen dhe profesionistët duhet të respektojnë këto indikacione sigurie.

Përktheu: Valbona Spahia