Roli i stomatologjisë në parandalimin dhe sensibilizimin e Koronavirusit

Masat që duhen përshtatur në klinikë, menaxhimi i pacientëve, komunikimi qoftë edhe nëpërmjet rrjeteve sociale. Eksperienca e presidentit të CAO Reggio Emilia, Fulvio Curti

Vëmendja ndaj Koronavirusit dhe masat e parandalimit të përshtatura në disa rajone të Italisë, po shkaktojnë forma të psikozës kolektive që mund të prekin edhe klinikën dentare, që është parë gabimisht si "vendi i përhapjes së virusit".

Një komunikim i qartë dhe i saktë ndihmon që të qetësohen qytetarët dhe në këtë detyrë një rol përcaktues mund ta bëjë edhe stomatologu.

"Ashtu si të gjithë drejtuesit shëndetësorë dhe drejtuesit e tjerë, tashmë edhe klinika dentare është e pajisur, personeli është i përgatitur dhe protokollet normale të sterilizimit dhe dezinfektimit na mbrojnë ne profesionistëve dhe pacientët tanë nga infeksionet më të rënda," - ka thënë për Odontoiatria33, Fulvio Curti, president i CAO në Reggio Emilia që në këto ditë, si një drejtues i një klinike dentare po përdor rrjetet sociale për të qetësuar pacientët e tij dhe për t'i informuar ata.

"Kemi komunikuar me pacientët e klinikës që procedurat tona të sterilizimit dhe parandalimit tashmë mbrojnë në mënyrë efikase nga çdo tipologji virusi apo formë tjetër infektimi. Më pas kemi përshtatur masat paraprake duke ndjekur indikacionet e Ministrisë së Shëndetësisë."

Me qëllim që të shmanget numri i lartë i pacientëve në sallën e pritjes, dr. Curti shpjegon se ka riprogramuar takimet në mënyrë që kontaktet ndërmjet pacientëve të jenë të limituara dhe më të menaxhueshme.
"I kemi kërkuar pacientëve me simptoma gripi që të na e sinjalizojnë, këto pacientë do të menaxhohen në mënyrë ekskluzive në fund të ditës në mënyrë që të shmanget çdo kontakt me pacientët e tjerë."

Gjithashtu në sallën e pritjes është vendosur në dispozicion të pacientëve një xhel hidroalkoolik për dezinfektimin e duarve dhe i kemi pajisur pacientët me një maskë që përdoret në kirurgji.

"Jam i bindur që duhet t'i kushtojmë shumë vëmendje çështjes, por gjithashtu jam i bindur se ne mjekët kemi një rol shumë të rëndësishëm sidomos në qetësimin e bashkëqytetarëve tanë, në shpjegimin se parandalimi nuk nënkupton që të pranohet një emergjencë por thjesht që janë përshtatur masat efikase. Dhe në këtë aspekt të informimit mund të përdoren edhe rrjetet sociale si Facebook, Twitter, Instagram, qoftë me account-in personal qoftë me atë të klinikës. Pacientët duket se e vlerësojnë këtë veprim."

Përktheu: Valbona Spahia