Një stomatologji "planet care"

Disa konsiderata dhe indikacione, të prof. Lorenzo Breschi në ushtrimin e stomatologjisë në një mënyrë më të ndërgjegjshme nga pikëpamja mjedisore

Stomatologjia është një profesion i dedikuar për promovimin dhe përmirësimin e shëndetit dhe mirëqenies orale. Për të arritur këto objektiva, stomatologët përdorin një shumëllojshmëri të madhe të materialeve dhe pajisjeve.

Për fat të keq, ndërmjet këtyre mund të rendisim substanca si metalet e rënda, mbetjet biomjekësore dhe plastike që paraqesin sfida të mundshme për mjedisin.

Mund të duket e vështirë, por stomatologjia ka një impakt të jashtëzakonshëm për planetin tonë për shkak të sasisë së madhe të mbetjeve që gjeneron nga procedura të ndryshme dentare.

Për më tepër, pjesa më e madhe e fazave klinike kërkon përdorimin e një sasie të madhe të ujit dhe elektricitetit. Për këto arsye, koncepti i një stomatologjie më ekologjike po përhapet në botën dentare dhe tërheq çdo ditë një numër më të madh të profesionistëve dhe industrive të përfshira në fushë.

"Stomatologjia e gjelbër," është një qasje shumë teknologjike që redukton impaktin mjedisor të procedurave dentare dhe përfshin një model shërbimi që mbështet dhe ruan mirëqenien. Në fakt, reduktimi i mbetjeve, ndryshimi i modeleve të konsumit dhe limitimi i sasisë së substancave kimike të dëmshme që futen në ajrit e një klinike dentare janë objektiva realistë dhe të arritshëm.

Riciklimi veçmas i letrës dhe pjesëve plastike të qeseve të autoklavave, përdorimi i radiografive dixhitale në vend të atyre tradicionale me rreze X që bazohen te filmi, përshtatja e dezinfektantëve dhe detergjenteve për sipërfaqet jo toksike dhe të biodegradueshme apo përdorimi i llambave LED në klinikë në vend të llambave halogjenë janë disa nga metodat e thjeshta për reduktimin e "gjurmëve të karbonit" të stomatologjisë. Një klinikë dentare ekologjike nuk duhet të jetë thjesht një përpjekje për "t'u ndjerë mirë".

Bota shkencore e ka dhënë tashmë dëshminë dërrmuese për ndryshimet klimatike globale dhe aftësisë së kufizuar ekosistemit të planetit tonë për absorbimin e degradimeve të mëtejshme. Duke marrë në konsideratë që pjesa më e madhe e klinikave dentare janë ndërmarrje të vogla private që nuk kanë ndonjë avantazh financiar dhe nuk kanë subvencione për të investuar në praktika që respektojnë mjedisin, zgjedhja për kalimin në "stomatologjinë e gjelbër" është lënë kryesisht në ndërgjegjen e stomatologut privat.

Për këtë arsye, janë të nevojshme kërkime të mëtejshme për të gjetur alternativa mjedisore të leverdishme për klinikën dentare me qëllim që të reduktohet impakti në planetin tonë.

Përktheu: Valbona Spahia