SIdP për pacientët: shkoni te dentisti vetëm në rast urgjence

Luca Landi: dentistët përshtatin të gjitha masat mbrojtëse por duhet të limitohet aksesi në kurat dentare vetëm për pacientët që kanë raste urgjente. 5 rregullat që i duhen paraqitur pacientëve

Nor. Mac.

Apeli i bërë nga Shoqëria italiane e Periodontologjisë dhe Implantologjisë (SIdP) nëpërmjet agjencive të shtypit është i qartë: shkoni te dentisti vetëm në rast urgjence.

"Respektimi rreptësisht i normave të sigurisë nga ana e të gjithëve është i domosdoshëm për të ndaluar përhapjen e virusit dhe objektivi ynë i parë është siguria e pacientëve," - thotë Luca Landi, president i SIdP.
"Nga momenti që pështyma është një nga mjetet kryesore të kontaminimit dhe përhapjes së virusit qoftë me anë të inhalimit, gëlltitjes apo kontaktit direkt me spërklat, qoftë me anë të kontaktit të mukozës me pështymën që gjendet te duart, objektet dhe sipërfaqet që kanë qenë në kontakt me virusin në 9 ditët e fundit, duhet të kemi parasysh që, - vijon Landi, - të limitojmë aksesin ndaj kurave stomatologjike vetëm me pacientët që kanë nevoja urgjente, duke i ndarë në varësi të kohëzgjatjes sipas regjimit të urgjencës shëndetësore dhe terapive të zakonshme"
Presidenti i SIdP saktëson edhe që shpëlarjet e gojës me kolutorë antibakterialë nuk janë në gjendje që të eliminojnë virusin në pështymën e prodhuar pas shpëalrjeve, por rikujton se është e nevojshme që të mbahet një standard i lartë i higjienës dentare dhe gingivale me përdorimin konstant të larjes së dhëmbëve dhe përdorimit të furçës interdentare."

Për patologjitë klinike që mund të konsiderohen si urgjenca, presidenti i SIdP indikon dhimbjet akute, infeksionet si abseci gingival, traumat ose aksidentet. Dhe për të shmangur grumbullimet në klinikë është mirë që të telefononi më parë dentistin dhe të vendoset me të për një orar të përshtatshëm për kurat.

SIdP këshillon pacientët që të ndjekin 5 rregulla në rast kur duhet të shkojnë në klinikën dentare.

Klinikat dentare janë të sigurta dhe janë në gjendje të përballojnë emergjencën e virusit thotë SIdP por për t'u ruajtur nga risqet që vijnë nga infektimi me të ekspertët kanë përpiluar edhe 5 rregulla që i adresohen pacientëve për të reduktuar në maksimum përhapjen e mundshme të Covid-19:

1) Lini xhupat, palltot apo çantat në sallën e pritjes;
2) Kur është e mundur vishni qese mbi këpucë;
3) Respektoni distancën e sigurisë me të paktën 1 metër në sallën e pritjes;
4) Lini celularët apo tablet-ët jashtë klinikës;
5) Lani duart për të paktën 20 sekonda dhe mos bëni shtrëngime duarsh me profesionistët.

Përktheu: Valbona Spahia