Covid-19: Një përpjekje e nevojshme

Lorenzo Breschi

Në 11 Mars, OBSH theksoi shqetësimin e saj për nivelet alarmuese të përhapjes si edhe ashpërsinë e sëmundjes por edhe nivelet e larta të mosveprimit. Gjithashtu ata kanë kryer një vlerësim që e karakterizuan COVID-19 si një pandemi.
Në 15 Mars, COVID-19 i njohur në më shumë se 100 vende, ka pasur një total prej 142 539 rastesh të konfirmuara në laborator dhe 5393 vdekje (OBSH 2020).
Të gjithë njerëzve, të çdo moshe dhe kombësie ju është kërkuar që të luftojnë së bashku kundër një armiku të padukshëm. Nëse ka pasur një kohë në historinë moderne të planetit tonë kur duhet të jemi të gjithë bashkë ajo kohë është pikërisht tani.

Por është thelbësore që të veprohet menjëherë për të ngushtuar pikun e sëmundjes për një periudhë më të gjatë prandaj shoqëria jonë duhet të jetë në gjendje të bashkëpunojë.
Të gjithë stomatologët, së bashku me punonjësit e tjerë të shëndetësisë janë në risk të madh infektimi. Për më tepër, për shkak të karakteristikave të mjedisit dentar, mundësia për infektim të kryqëzuar është shumë e lartë ndërmjet profesionistëve të shëndetit dhe pacientëve. Pra ne kemi një rol të rëndësishëm në mbajtjen e kësaj pandemie dhe duhet të përpiqemi që të reduktojmë risqet e kota.
Deri më tani, nuk ka pasur konsensus për masat e shërbimeve dentare gjatë epidemisë së COVID-19, sidoqoftë në bazë të eksperiencave tona dhe udhëzimeve e kërkimeve të rëndësishme, ne rekomandojmë fortësisht që të trajtohen vetëm rastet emergjente si edhe të përshtaten implementimet e parandalimit të infektimit dhe masave të kontrollit.

Kur trajtohen emergjencat duhet të kujtojmë se standardi i masave mbrojtëse në punën e përditshme klinike nuk janë mjaftueshëm efektive për të parandaluar përhapjen e COVID-19, veçanërisht kur pacientët janë në periudhën e inkubimit, që janë të pavetëdijshëm që janë të infektuar ose zgjedhin ta fshehin infektimin e tyre. Digat e gomës dhe aspiratori i pështymës mund të ndihmojnë në minimizimin e aerosolit ose spërklave në procedurat dentare. Për më tepër, maskat dhe syze janë thelbësore kur përdoren frezat me ujë me shpejtësi të lartë ose të ulët. Duke qenë se spërklat respiratore janë rruga kryesore e transmetimit të COVID-19, respiratorë të veçantë janë rekomanduar për praktikën dentare (Referenca: Transmission routes of 2019-nCoV and controls in dental practice, IJOS 2020 ; Coronavirus Disease 2019 (COVID-19): Emerging and Future Challenges for Dental and Oral Medicine, JDR 2020 ).
Higjiena e duarve është konsideruar masa më e rëndësishme për reduktimin e riskut të transmetimit të mikroorganimit te pacientët.

COVID-19 mund të persistojë në sipërfaqe për disa orë apo ditë. Kjo përforcon nevojën për higjienë shumë të mirë të duarve dhe rëndësinë e dezinfektimit të të gjitha sipërfaqeve brenda klinikës dentare.
Në mes të këtij momenti të paprecedent, si një njeri i shkencës, unë ju rekomandoj të dashur lexues që të dëgjoni shkencëtarët, kërkuesit dhe komunitetin mjekësor dhe të shmangni lajmet e paverifikuara e të parandaloni përhapjen e keqinformimit që mund të shkaktojnë valë paniku të pakontrolluara.
Dhe së fundmi, edhe pse gjërat duken të vështira tani, mbani mend që do ja dalim kësaj epidemie, ashtu sikundër kemi kaluar edhe shumë eksperienca të vështira më parë, nëse kujdesemi për njëri-tjetrin dhe nëse angazhohemi plotësisht për të parandaluar dëmtimet e mëtejshme.

I juaji,
Lorenzo Breschi

Përktheu: Valbona Spahia