AIFA saktëson: Përdorimi i favipiravirit për COVID-19, i paautorizuar në Evropë e SHBA. Prova të dobëta shkencore mbi efikasitetin

Në lidhje me informacionet e fundit të qarkulluara në internet dhe në shtyp që lidhen me përdorimin e produktit mjekësor me bazë favipiraviri në trajtimin e COVID-19, Agjencia Italiane e Barnave specifikon, sa vijon:
Favipiravir (emri tregtar Avigan) është një antiviral i autorizuar në Japoni që nga marsi 2014 për trajtimin e formave të gripit të shkaktuara nga viruse gripi të reja ose të rishfaqura dhe përdorimi i tij është i kufizuar në rastet kur antiviralët e tjerë janë joefektivë. Bari nuk është i autorizuar në Evropë ose në SHBA.

Deri më tani, nuk ka studime klinike të publikuara në lidhje me efikasitetin dhe sigurinë e barit në trajtimin e sëmundjes COVID-19. Vetëm të dhënat paraprake, aktualisht të disponueshme vetëm si një version pre-proof (pra, që nuk i janë nënshtruar ende një shqyrtimi ekspert), të një studimi të vogël jo me përzgjedhje rastësore. Studimi është kryer në pacientë me COVID-19 jo të rëndë, me jo më shumë se 7 ditë që nga nisja, në të cilin produkti mjekësor favipiravir është krahasuar me antiviralin lopinavir/ritonavir (edhe ky jo i autorizuar për trajtimin e sëmundjes COVID-19), përveç kësaj, në të dyja rastet, me interferonin alfa-1b përmes aerosolit. Edhe pse të dhënat në dispozicion duket se sugjerojnë një aktivitet të mundshëm të favipiravirit, veçanërisht përsa i përket shkallës së zhdukjes së virusit nga gjaku dhe në disa aspekte radiologjike, të dhënat për efikasitetin e vërtetë në përdorimin klinik dhe mbi evolucionin e sëmundjes, mungojnë. Të njëjtët autorë raportojnë si kufizime të studimit se marrëdhënia midis titrit viral dhe prognozës klinike nuk është sqaruar mirë dhe se, duke mos qenë një studim klinik i kontrolluar, mund të ketë shtrembërime të pashmangshme të përzgjedhjes në rekrutimin e pacientëve.

Komisioni tekniko-shkencor i AIFA-s, duke u mbledhur në një seancë të përhershme, rivlerëson çdo ditë të gjitha provat që bëhen të disponueshme, me qëllim ndërmarrjen e çdo veprimi (përfshirë autorizimin e shpejtë për të kryer studime klinike) në mënyrë që të sigurojë menjëherë opsionet më të mira terapeutike për COVID-19 bazuar në të dhëna të forta shkencore.

AIFA është e përkushtuar vazhdimisht në mbrojtjen e shëndetit publik, aq më tepër në një rast urgjence si ky aktual, duke dhënë informacion në kohë dhe të përditësuar mbi provat shkencore dhe, duke kërkuar të mos u jepet rëndësi lajmeve të rreme dhe pretendimeve të rrezikshme, rezervon të drejtën të ndërmarrë veprime juridike kur është e përshtatshme.

Burimi: AIFA