Ndërhyn sektori tekstil në emergjencën për maskat

Çdo ditë rritet lista e sektorit të kompanive tekstile dhe të modës që kanë aktivizuar linja prodhimi për maskat mbrojtëse

M.Boc

Në të gjithë Italinë po shumëfishohen kompanitë tekstile dhe ato të modës që duan të aktivizojnë linjat e prodhimit për maskat mbrojtëse.
Me një njoftim zyrtar, Rajoni i Piemontes ka njoftuar një javë më parë se do të jenë kompanitë e Miroglio Group nga Alba që do të prodhojnë maska cope për përdorim sanitar, të cilat nevojiten për emergjencën e koronavirusit në Piemonte. Këtë njoftim e ka dhënë Luigi Genesio Icardi, Vlerësues rajonal i Shëndetësisë, pasi kompania ka konfirmuar mundësinë që t'i përgjigjet nevojave të shprehura nga Njësia e Krizave, brenda një kohe të shkurtër dhe në mënyrat e kërkuara.

Icardi ka deklaruar se i janë mirënjohës kompanisë që i është përgjigjur apelit, veçanërisht për interesimin personal të Giuseppe Miroglio. Maskat që do vihen në dispozicion të spitaleve, profesionistëve të shëndetësisë, farmacive dhe të infektuarve në izolim shtëpiak janë kthyer në një nevojë të parë.
"Ka mungesë pajisjesh të sigurisë në të gjithë botën edhe në Piemonte kemi në mënyrë dramatike këtë emergjencë. Maskat që do të ofrojë Miroglio Group, ndërmjet të tjerash kanë një avantazh se mund të lahen dhe të ripërdoren, ndryshe nga maskat e zakonshme që janë njëpërdorimshe. Në planin ekonomik, veprimi është bërë i mundur falë ndjeshmërisë së jashtëzakonshme të dy Distretti Rotary në Piemonte, që kanë garantuar mbështetjen ekonomike të iniciativës dhe që është njohur në Rajon. Do të ofrohen rreth 25 mijë maska në ditë, ekskluzivisht për Piemonten. Janë duke u kryer verifikimet për certifikimin nga ana e Institutit të lartë të Shëndetësisë.

Por kujt do t'i vijnë në ndihmë këto maska?
Gruppo Miroglio po i përgjigjet kërkesës që ka ardhur nga Mbrojtja Civile nëpërmjet Njësisë së Krizave Rajonale, por duke qenë se ka pasur me qindra kërkesa, në njoftim është thënë se do të bëhet gjithçka është e mundur për të përballuar të gjitha kërkesat. Problemi për momentin është sigurimi i lëndës së parë prej pambuku, por po punohet me ritme të larta edhe në këtë drejtim.
Përsa i përket karakteristikave, njoftimi përshkruan se maskat kirurgjikale prej pambuku dhe elastani, të trajtuara me produkte të qëndrueshme ndaj ujit, mund të lahen dhe të ripërdoren për disa herë radhazi. Në këtë moment nuk ka kohë teknike për certifikimin CE (proces që do të kërkonte disa muaj) por Rajoni ka dhënë aprovimin për përdorim.

Është rënë dakord për një çmim minimal duke lejuar kështu mbulimin e kostove të prodhimit. Përveç saktësimeve të cituara më lart, njoftimi thekson se ka arritur të sigurojë në kohë rekord rrjetin prodhues në mënyrë që të kenë mundësi të realizojnë maskat brenda një kohe të shkurtër.
Falë përqindjes në elastan dhe strukturës së veçantë, indi elastik i maskave priret që të aderojë në sipërfaqet me të cilat është në kontakt. Kompania ka deklaruar se do të jetë në gjendje të prodhojë 600 mijë maska për dy javë, që janë të barabarta me 6 milionë përdorime.

Përktheu: Valbona Spahia