Tele-dentistria një ndihmë e mundshme për klinikën dentare në kohën e koronavirusit

Ende nuk është e mundur që të kurohet një pacient nga larg, por teknologjitë e reja mund të ndihmojnë dentistin që të vlerësojë në distancë problemet klinike për të cilat ankohet pacienti. ADA ka indikuar disa rregulla.
Tele-dentistria (Teledentistry) është një konsultë dentare ose planifikimi i një plani trajtimi i realizuar falë shkëmbimit të informacioneve dhe imazheve klinike që kryhen nëpërmjet përdorimit të telekomunikacionit, ndërmjet një pacienti dhe një dentisti të pozicionuar në distancë.
Këto ditë emergjence kur dentistët duhet të menaxhojnë me kujdes spostimet e pacientit dhe të vlerësojnë nëse duhet trajtuar e në ç'mënyrë, kjo teknologji mund të rezultojë e dobishme për të shmangur një kontakt direkt që mund të jetë i padobishëm.
Por në vendin tonë tele-dentistria nuk është shumë e përdorur.

Për këtë temë ka folur edhe doktor Davis Cussotto, i cili është shprehur: "Ndoshta nuk mund ta përkufizojmë tele-dentistri por këto kohë kam përdorur Whatsapp për të intervistuar disa pacientë që ankoheshin se kishin probleme. Për shembull një pacient ankohej për dhimbje, i kërkova të më dërgonte foto të kuadrantit ku ndjente dhimbje, pasi rishikova radiografitë që kisha në arkivë i caktova një takim sepse mund të duhej të bëja një ekstraksion të molarit të 3. Një shembull tjetër ishte me një paciente që më ka telefonuar sepse i kishte rënë proteza nga duart. I kërkova të regjistronte një video ndërkohë që përpiqej të vendoste të dyja protezat si në nofull, e vura re që përputheshin ndaj nuk ishte e nevojshme që të merrej gjurma dhe kështu shmanga edhe daljen e zonjës nga shtëpia."
Në SHBA tele-dentistria është më e pëdorur tregon Cussotto. Për shembull nga ushtritë që duan të trajtojnë trupat e tyre larg specialistëve dentarë. Ndërsa në Australi ka gjetur përdorim në fushën e programeve pilote që i janë dedikuar zonave që janë shumë larg dhe janë të vështira për t'u arrirë. Një dentist "tutor" apo një infermier, viziton pacientin dhe pas një tele-konsulte kryen një terapi emergjence.
ADA, këto ditë pandemie, ka ofruar indikacione për përdorimin e gjerë të programit të tele-shëndetit (Telehealth) që i referohet një game të gjerë teknologjie për të ofruar shërbimet mjekësore dhe edukative virtuale për të përmirësuar asistencën dhe udhëzimet për popullsinë.

Modalitetet e ndërveprimit janë katër:
1) Një intervistë me anë të një videoje live ndërmjet pacientit dhe mjekut.
2) Store-and-forward pra dërgimi i informacioneve shëndetësore të regjistruara (radiografi, fotografi, video, gjurmë dixhitale të pacientit) nëpërmjet një sistemi komunikimi elektronik të sigurt te një profesionist, që përdor informacionet për të vlerësuar gjendjen e pacientit në një mënyrë ndryshe.
3) Monitorimi i pacientit nga larg (RPM): grumbullimi i të dhënave shëndetësore dhe mjekësore nga një individ nëpërmjet teknologjive të komunikimit elektronik, që transmetohet nga një kujdestar
4) Mobile health (mHealth): asistenca shëndetësore dhe praktikat e shëndetit publik dhe edukimit smart, falë pajisjeve të përshtatshme dixhitale personale (PDA) që punojnë me anë të një aplikacioni të shkarkuar.

Stomatologët që përdorin tele-dentistrinë duhet të dokumentojnë se gjithçka që kryejnë e bëjnë duke u bazuar në evidenca shkencore. Pacientit i garantohet nga ai që menaxhon platformën e telekomunikacionit, besueshmëria e stomatologut që do e kontrollojë. Shërbimet e tele-dentistrisë kryhen në përputhje me normativat në zbatim të privatësisë dhe sigurisë së informacioneve shëndetësore të pacientëve.

Dentulu është provider më i rëndësishëm i Teledentistry USA që vë në kontakt dentistët me pacientët e tyre duke ju ofruar 3 lloje shërbimesh:
1)   Teledentistry: konsulta nga larg falë një minivideo kamere intraorale, që Dentulu ju dërgon në shtëpi pacientëve, për të transmetuar më pas imazhet në një aplikacion që e disponon dentisti.
2)   ER emergency room: i cakton pacientit një takim me një profesionist që kryen trajtimet e urgjencës në klinikë, gjatë periudhës së karantinës.
3)   Mobile dentistry:  i cakton pacientit një takim me një profesionist që kryen trajtime në shtëpi për ata që nuk mund të lëvizin ose janë në karantinë.

"Duke parashikuar rihapjen e klinikave tona dhe kufizimet e distancës sociale që duhet të ruajmë edhe ne në klinikë, Tele-dentistria mund të bëhet gjatë muajve të ardhshëm një instrument mjaft i dobishëm për të kuptuar problematikat reale të pacientëve dhe për të programuar më mirë ndërhyrjet në klinikë," - përmbyll dr. Cussotto.

Përktheu: Valbona Spahia