Sa duhet të jetë përqindja e alkoolit për dezinfektantët dhe detergjentët që përdoren nga pacientët

Federfarma ka kërkuar që të bëhen qartësime në lidhje me një komunikim që është bërë në Itali nga ministria për dezinfektantët që duhen përdorur në sallën e pritjes. Cila duhet të jetë përqindja e saktë e etanolit (alkoolit) për larjen apo dezinfektimin e duarve?

Lorena Origo

Ndërmjet procedurave që janë indikuar si të nevojshme për t'u aktivizuar në klinikë në fazën e pritjes së pacientëve por edhe në fazën e largimit të tyre është larja e duarve.
Indikacionet e dhëna nga ministria në Itali parashikojnë dy mundësi: ose me solucion alkoolik, edhe në formë xheli, ose me ujë dhe sapun. Në të dyja rastet nevojitet një pajisje për solucionet që është në përputhje me protokollin e nxjerrë nga OBSH në 2009.

Po për solucionet alkoolike, sa duhet të jenë përqindjet e alkoolit: ndërmjet 60% dhe 70% apo jo më pak se 70%?
Këtë çështje e ka ngritur këto ditë Federfarma duke vënë në dukje edhe problemin e sigurimit të produkteve dhe kostos së tyre.
Duke iu drejtuar instancave përkatëse Federfarma ka kërkuar sqarime në lidhje me dezinfektantët dhe detergjentët, veçanërisht në lidhje me mënyrën e pëdorimit dhe përqindjet e efikasitetit të produkteve që përdoren, për shembull në sallën e pritjes, ku indikohet se për larjen e duarve, përqindja e etanolit nuk duhet të jetë më pak se 70%.

"Mbi këtë çështje," - shkruan Federfarma, - "duhet theksuar paraprakisht se indikacioni për të cilin po flasim (pra ai që indikon një përqindje jo më të vogël se 70% të alkoolit) bie në kundërshtim me atë që është dhënë nga Instituti i Lartë i Shëndetësisë (ISS), që indikon një përqendrim nga 60 deri në 70%.
Në fakt në uebsitin e ISS në materialin e publikuar më datë 28 shkurt është thënë se është e mundur të përdoret edhe një dezinfektant duarsh me bazë alkooli 60%, ndërkohë që më pas në një artikull të publikuar më 26 mars është theksuar se është e mundur të përdoren solucione për dezinfektimin e duarve me të paktën 60% alkool. Larja e duarve dhe dezinfektimi i tyre janë thelbësore për parandalimin e infeksionit. Duhet të lahen duart shpesh dhe me kujdes me ujë dhe sapun për të paktën 20 sekonda, apo edhe 40-60 sekonda. Nëse nuk kemi mundësinë për t'i larë duhet të dezinfektohen me një dezinfektant për duart që ka të paktën 60% alkool. Në uebsitin qeveritar italian krahas infografikës mbi sjelljet që duhet të kemi parasysh është edhe fjalia që është e mundur të përdorim një dezinfektant për duart me bazë alkooli 60%.

Federfarma nënvizon se këto paqartësi në dhënien e informacionit duhen qartësuar menjëherë pasi mbetet për tu verifikuar edhe efikasiteti anti-COVID i produkteve të përdorura deri më sot. Parimisht duhet vendosur edhe për fatin e shumë produkteve që janë në treg, të cilat përmbajnë përqendrimet e alkoolit nga 60-70% që deri më tani janë konsideruar si të përshtatshme për veprimin anti-COVID.
Për këtë arsye, evidentohet se, jashtë kuadrit të ndërhyrjes për emergjencën shëndetësore në zbatim, në terma lex specialis produktet që kryejnë funksionin si dezinfektant ndahen në dy: mjekësorë-kirurgjikalë dhe biocidë. Hedhja në treg e këtyre produkteve korrespondon me normativat specifike të sektorit që parashikojnë lëshimin e autorizimeve/regjistrimeve nga ana e Ministrisë së Shëndetësisë, me kërkesën që kontrolle të përshtatshme të vlerësojnë sigurinë e përdorimit për konsumatorin dhe për ambientin si edhe të jenë efikasë në përdorim. Por nuk do të ishte koherente me të tilla normativa të sektorit, indikacioni i një përqindjeje minimale të alkoolit etilik si një parametër që garanton efikasitet.
Dhe sipas profilit tekniko-shkencor duhet sinjalizuar se në uebsitin e ministrisë nuk sqarohet as nëse përqindja e etanolit jo më pak se 70% i referohet përqindjes për vëllim. Dhe në fakt jo vetëm që nuk evidentohet kjo por nuk ka të dhëna as për vlerën e përqendrimit maksimal, gjë që mund të çojë në përdorimin në mënyrë joefikase të alkoolit të pastër.

"Sigurisht nuk mund të anashkalojmë,"- përmbyllet shkrimi,- "faktin që efekti i indikacioneve për shtimin e përqindjes së alkoolit në produktet për të cilat flitet mund të çojë në mungesën e xhelit apo solucionit dezinfektant në treg dhe si pasojë të përballemi me një rritje çmimesh, duke qenë se pjesa më e madhe e produkteve kanë përqendrime më të larta se 60% por më të ulëta se 70%."

Përktheu: Valbona Spahia