Modifikimi i aerosolit të prodhuar nga frezëmbajtësit për të reduktuar riskun që lidhet me transmetimin e Covid-19

Zgjidhja është dhënë nga një grup kërkuesish italianë: mundësia për të modifikuar sprajin e prodhuar nga frezëmbajtësit për të reduktuar rrezikshmërinë nga aerosolët në praktikën stomatologjike

Është vënë re sesi risku i infeksionit nga SARS-Cov2 është rritur në mënyrë të konsiderueshme për shkak të prodhimit masiv të aerosolit nga ana e instrumenteve të përdorura. Veçanërisht, spraji i ftohjes së frezëmbajtësve, qofshin ato rrotullues apo me lëkundje, paraqet një nga burimet kryesore të sprucimeve të aerosolit në brendësi të njësisë operative stomatologjike. Ka evidenca eksperimentale që tregojnë sesi aerosolët e gjeneruar nga procedurat stomatologjike mund të arrijnë distanca prej më shumë se 3 m nga zgavra orale e pacientit.
Nga kjo pikëpamje qoftë sprucimet qoftë aerosoli mund të shërbejnë si vektorë për agjentë të ndryshëm infektivë. Përveç pajisjeve për mbrojtjen personale dhe të gjitha procedurave të nevojshme për të reduktuar risqet e infektimit nga aerosoli mund të jenë të mundshme masa të tjera parandaluese që vijnë nga një ndërhyrje direkte në përbërjen e sprajeve të ftohjes. Autorët në fakt janë duke studiuar një zgjidhje për këtë problem.

"Kemi marrë në konsideratë mundësinë për të reduktuar rrezikshmërinë e aerosolëve të gjeneruar nga instrumentet rrotulluese-lëkundëse," - thotë prof. Eugenio Brambilla, i Universitetit të Milanos.
Duke qenë se jemi në vijimësinë e eksperimentimit nga ana e kërkuesve italianë ka dalë në pah edhe koncepti se spërklat e aerosolit të prodhuara nga turbina ose scaler-i janë një mjet transmetimi i virusit që mund edhe të transformohen në një instrument për të reduktuar ngarkesën virale.
"Ky objektiv," - thotë profesori, - "mund të arrihet nëpërmjet futjes së një agjenti dezinfektues në sprajin ajër-ujë në zëvendësim të ujit të rrjetit që përdoret në kushte normale. Të dhënat e pakëta që janë të disponueshme në literaturë na tregojnë se një solucion peroksidi hidrogjeni me një përqendrim të barabartë me 0.5%, pra shumë të ulët, është efikas në inaktivizimin e disa llojeve të koronavirusit në 60 sekonda."

"Edhe në mungesë të një demonstrimi direkt," - vijon ai - "duket e arsyeshme që në këtë periudhë emergjence përdorimi i peroksidit të hidrogjenit me 0.5% në vend të ujit të rrjetit mund të reduktojë në mënyrë të konsiderueshme ngarkesën infektive të SARS-Cov 2 në aerosolin e prodhuar nga frezëmbajtëset. Kjo ndodh qoftë në fazën kur aerosoli qëndron pezull në ajrin e sallës, qoftë në periudhën pasuese kur aerosoli bie në sipërfaqe. Sigurisht që ideja nuk është bazuar në të dhëna direkte por duhet të kujtojmë se as për zgjedhjen e dezinfektantëve që këshilohen për dezinfektimin e sipërfaqeve apo për shpëlarësit pre-operativë nuk ekzistojnë të dhëna direkte."
Kërkuesit propozojnë pra që të hidhet një solucion me 0,5% peroksid hidrogjeni në qarkun sekondar të ujit, duke qenë se pjesa më e madhe e uniteve dentare që janë prodhuar së fundi janë të pajisur me një të tillë. Për ata unite që janë pak më të vjetër është e mundur që të bëhet një modifikim i thjeshtë.
"Një qark i tillë, duke qenë se është projektuar për të përdorur peroksidin e hidrogjenit në përqendrime shumë më të larta nuk paraqet rreziqe përsa i përket solucionit të propozuar." - sqaron prof. Brambilla.
Në këtë mënyrë agjenti infektues do të linte gojën e pacientit pozitiv të pajisur me dezinfektues dhe risku i infektimit të kryqëzuar duhet të reduktohet në mënyrë të konsiderueshme.

"Peroksidi i hidrogjenit," - indikojnë kërkuesit, - "mund të provokojë humbje të lehta nga frezëmbajtësit për shkak të zhvillimit të oksigjenit dhe presioneve të tepërta në brendësi të qarqeve. Toksiciteti i peroksidit të hidrogjenit në përqendrimin e sugjeruar është shumë i ulët, duke marrë në konsideratë faktin se vetë principi aktiv është përdorur normalisht si kolutor me përqendrime të barabarta me 1%. Pavarësisht kësaj, si masë paraprake këshillojmë që të mbrohen sytë e pacientit me syze mbrojtëse."
Inteferenca të mundshme të peroksidit të hidrogjenit me materialet e përdorura në procedurat terapeutike duhet të merren në konsideratë për çdo rast.
"Një shembull," - vijojnë kërkuesit, - "mund të jetë interferenca e mundshme e peroksidit të hidrogjenit me adezivët smalt-dentinë. Në këtë rast problemi mund të zgjidhet nëpërmjet larjes me ujë rrjeti gjatë fazës së eliminimit të xhelit për gdhendje."
"Kujtojmë që kjo procedurë," - përfundon prof. Brambilla, - "mund të lejojë stomatologun që të vijojë të veprojë duke reduktuar riskun e infeksionit qoftë për profesionistët qoftë për pacientët, gjatë periudhës së bashkëjetesës me koronavirusin si edhe në periudhën vijuese, duke ngritur mjaftueshëm standardet të parandalimit të infeksioneve të kryqëzuara edhe përballë agjentëve të tjerë infektivë. Grupi i kërkimit është në punë për të prodhuar të dhënat mbi koronavirusin që do të ofrojnë demonstrime përfundimtare."

Përktheu: Valbona Spahia