Reagimet e pacientëve nga frika e pandemisë

Një studim spanjoll ka analizuar impaktin e Covid-19 në vulnerabilitetin e vetë-perceptuar dhe të komponentëve të vënë në veprim në lidhje me kurat dentare dhe klinikat

Nga Davis Cussotto

Në periudhën nga shkurti deri në prill të këtij viti, nëpërmjet rrjeteve sociale dhe mediave konvencionale shumë persona, në Evropë kanë marrë lajme alarmuese mbi pandeminë nga COVID 19. Këto lajme kanë influencuar negativisht popullsinë duke gjeneruar stres, frikë nga infektimi, frustrim nga mungesa e maskave, syzeve mbrotjëse, dezinfektantëve të duarve, ushqimeve apo produkteve të tjera.
Parandalimi i një sëmundjeje është transformuar shumë shpejt në një frikë të dukshme nga infektimi dhe të gjitha vendet ku grumbullohen njerëz, si qendrat tregëtare, mjetet e transportit, palestrat dhe hapësirat ku kontakti interpersonal hyn në raportin e kujdesit si spitalet dhe klinikat dentare janë parë me dyshim.
Një grup kërkuesish spanjollë të udhëhequr nga Maria Jose Gonzalez Olmo, docente e ortodoncisë në Universidad Rey Juan Carlos në Madrid, ka kërkuar që të identifikojë në popullsinë adulte të Madridit impaktin e Covid-19 në vulnerabilitetin e vetë-perceptuar, të infektimit, të neverisë ndaj baktereve dhe sjelljet e tjera që janë kryer në lidhje me kurat dentare dhe klinikat dentare. Bëhet fjalë për një studim observues të tërthorë, të publikuar në revistën Brazilian Oral Research që ka përfshirë 1.008 persona të intervistuar rastësisht në rrugët e Madridit nga 1 marsi deri në 8 mars 2020.
Pjesëmarrësit në studim kishin një moshë nga 18 deri në 83 vjeç. 41,50% ishin meshkuj dhe 58,50% femra. Pjesëmarrësit që kanë pasur simptoma që mund t'i atribuoheshin një sëmundjeje infektive në momentin e grumbullimit të të dhënave janë përjashtuar sepse kjo mund të influenconte përgjigjet e tyre. Në kampion është identifikuar një grup në risk, i barabartë me 34% të të intervistuarve, në bazë të pranisë ose jo të të paktën njërit nga faktorët e mëposhtëm: kardiopatia ishemike, insuficienca respiratore, imunosupresioni, diabeti, mosha mbi 60 vjeç.

Vulnerabiliteti i perceptuar ndaj sëmundjes është vlerësuar nëpërmjet shkallës së Magallares. Pikët e pjesëmarrësve janë marrë duke llogaritur mesataren e përgjigjeve të pyetjeve në këtë shkallë. Pikët më të larta kanë indikuar një vulnerabilitet më të madh të peceptuar për infeksionet. Formati i përgjigjes bazohet në shkallën Likert me shtatë pikë, që varionte nga 1 ("nuk jam i shqetësuar...") deri në 7 ("kam më shumë shanse për të marrë një sëmundje infektive krahasuar me personat e tjerë në ambientin ku qëndroj").
Pjesëmarrësve i janë kërkuar disa informacione bazë:
- Aspektet socio-demografike (gjinia, mosha dhe niveli i edukimit).
- Anamneza në veçanti për praninë e sëmundjeve kardiovaskulare, sëmundjet respiratore, imunosupresionin ose diabetin.
- Sjelljet në lidhje me higjienën personale, si përdorimi i maskës apo dezinfektantit dhe larja e duarve. Formati i përgjigjes është realizuar nëpërmjet një pyetjeje të mbyllur (përgjigjja po/jo).
- Frika për të shkuar te dentisti dhe anulimi i takimit të shkak të frikës nga infektimi. Formati i përgjigjes është realizuar nëpërmjet një pyetjeje të mbyllur (përgjigjja po/jo).
- Perceptimi i riskut të infektimit gjatë hyrjes në vende të caktuara. Si të vlerësojmë ambientet në bazë të riskut të infektimit nga koronavirusi (klinika dentare, supermarket, kinema/teatër, spital, stadium, palestër, lokal nate, qendër estetike, bibliotekë, etj.). Është përdorur shkalla Likert me pesë pikë nga 1 ("Asnjë risk") deri në 5 ("Risk shumë i lartë").
- Perceptimi i riskut të infektimit nga stomatologu gjatë kryerjes së disa procedurave ose në situata të caktuara (për shembull, të jesh pacienti i fundit i ditës, qëndrimi në sallën e pritjes për më shumë se 15 minuta, kryerja e një ekstraktimi, një procedure endodontike, një mbushje. Është përdorur shkalla Likert me pesë pikë nga 1 ("Asnjë risk") deri në 5 ("Risk shumë i lartë").

Rezultate

38,7% ka përdorur maskën në rrugë, 76,1% ka larë duart sapo ka mbërritur në shtëpi, 91,6% nuk ka pasur frikë se mund ta marrë virusin nga stomatologu dhe 90,1% nuk kanë anuluar takimin e caktuar. Në fushën shëndetësore ambientet që janë perceptuar me më shumë risk për infektimin me virus kanë qenë ato të spitaleve, të ndjekura nga ambulancat e mjekësisë së përgjithshme dhe në vend të tretë kanë qenë klinikat dentare.

Në lidhje me stomatologjinë situata që është perceptuar si më me risk ishte ajo e të qenit pacienti i fundit i ditës. Grupi në risk ka prodhuar tregues të vulnerabilitetit në mënyrë të konsiderueshme më të larta.
Përdorimi i maskave dhe dezinfektantëve ka pasur përqindje më të larta, ndërsa larja e duarve ka pasur një përqindje mesatare. Pikët e larta mbi mesataren lidhen me ankthin e frekuentimit të vendeve të populluara, përveç stadiumit dhe ambienteve shëndetësore, përfshirë këtu edhe ato stomatologjike.
Disa nga diferencat kanë qenë se femrat kanë përdorur më shumë dezinfektantët e duarve dhe kurat dentare kanë pikë më të larta në perceptimin e riskut në trajtimet kirurgjikale dhe endodontike.
Studimi tregon se personat mbi 60 vjeç dhe ata që kanë patologji sistemike, në Madrid në gjysmën e parë të muajit mars, paraqisnin nivele të larta vulnerabiliteti për një infektim të mundshëm nga COVID-19.
Rezultatet ndryshojnë për pjesën tjetër të popullsisë, që paraqet nivele të ulëta vulnerabiliteti ndaj COVID-19.

Përktheu: Valbona Spahia