Maska mbron edhe personin që e mban. Ja cilat funksionojnë dhe cilat jo

Sipas një udhëzuesi të ri të miratuar nga Centers for Disease Control and Prevention (Cdc) në Shtetet e Bashkuara, maskat faciale mund të mbrojnë edhe personin që i mban dhe të tjerët nga infektimi me Sars-CoV-2.

Përditësimi sjell një variacion në udhëzuesin e mëparshëm që afirmonte se maskat ndalonin kryesisht përhapjen e virusit te të tjerët, e nuk mbronin atë që e vendos. "Maskat ndihmojnë në reduktimin e inhalimit të spërklave nga ana e atij që i mban," - shpjegojnë tashmë ekspertët e Centers for Disease Control and Prevention (Cdc) në komunikimin e ri.
Sipas dokumentit, maskat me shumë shtresa prej cope mund të ofrojnë një filtrim të mjaftueshëm për mbrojtjen personale dhe të bllokojnë pjesëzat e virusit që ekspirohen nga të tjerët. Raporti citon studime të ndryshme të fundit që kanë treguar një reduktim të transmetimit të virusit, që në disa raste arrin deri në mbi 70%.
Në një shembull, përdorimi i një maske nga ana e parukierëve të infektuar ka ndaluar transmetimin në 67 klientë të tyre që kanë kryer më pas kontrollin. Në një tjetër skenar, personat që mbanin maskë në fytyrë gjatë udhëtimeve të gjata internacionale kanë shmangur infektimin e personave që kanë qenë ulur ngjitur me ta në avion.

"Përshtatja e politikave universale për mbajtjen e maskës mund të ndihmojë në shmangien e karantinave të ardhshme, sidomos nëse këto do të kombinohen me ndërhyrje të tjera jo farmaceutike si distancimi social, higjiena e duarve dhe një ventilim i përshtatshëm," - lexohet në dokument.
Kërkuesit kanë nënvizuar se disa lloje maskash prej cope mund të jenë efikase pothuajse po aq sa ato kirurgjikale në bllokimin e spërklave respiratore; për shembull polipropileni mund të krijojë një ngarkesë statike që kap spërklat dhe mëndafshi mund t'i kthejë pas spërklat.
Në kompleks, maskat me më shumë shtresa dhe një numër më të lartë fijesh në copë janë më efikase në ndalimin e transmetimit të virusit në krahasim me maskat me një shtresë dhe me një numër më të vogël fijesh. Në disa raste, maska me shumë shtresa është në gjendje të filtrojë pothuajse 50% të pjesëzave me përmasa më të vogla sesa 1 mikron.

Përktheu: Valbona Spahia