Covid-19: shtimi i çrregullimeve të gjumit gjatë pandemisë

Sipas një studimi të ri të botuar në "Journal of Sleep Research", pandemia Covid-19 ka pasur një ndikim të thellë në zakonet e gjumit të njerëzve. "Situata shëndetësore ka një ndikim të madh dhe të vështirë klinikisht dhe rëndësia e një pushimi të mirë është rritur ndjeshëm" shpjegon Rébecca Robillard, nga Universiteti i Otavës, autore kryesore e studimit.

Studiuesit kryen një sondazh në internet ku morën pjese 5,525 kanadezë gjatë fazës fillestare të pandemisë, dhe zbuluan se gjysma e pjesëmarrësve tregoi shenja të problemeve të rënda të gjumit dhe u identifikuan në mënyrë specifike tre profile të ndryshme të ndryshimeve në ritmin e gjumit dhe zgjimit. Në fakt, një grup njerëzish fjetën më shumë, një grup tjetër fjetën më vonë, dhe si pasojë u zgjuan më vonë se zakonisht, dhe një grup tjetër fjetën më pak.

Studiuesit argumentojnë se këto ndryshime jo vetëm që ndikuan në vetë cilësinë dhe sasinë e gjumit, por gjithashtu patën një efekt në reagimin psikologjik ndaj kësaj situate të pa ndodhur më parë. Në fakt, krahasuar me ata që flinin më shumë, ata që kishin orare të vonuara ose cikle më të shkurtra të gjumit treguan rritje të simptomave të pagjumësisë dhe përkeqësim të simptomave të stresit, ankthit dhe depresionit.

Këto vështirësi duket se kanë prekur në mënyrë disproporcionale gratë, njerëzit me përgjegjësi familjare, punonjësit dhe njerëzit me sëmundje kronike.
Autorët raportojnë se kanë parë një rritje të përdorimit të barnave të gjumit gjatë pandemisë dhe besojnë se kjo mund të çojë në një shtim të rasteve më komplekse të pagjumësisë kronike afatgjatë.

"Sigurisht që kishim pritur probleme me gjumin dhe shëndetin mendor në rrethanat aktuale, por jo në këtë nivel. Është e rëndësishme të merren masa për të trajtuar këtë fenomen" vazhdon Robillard.

Ekspertët sugjerojnë që, për të përmirësuar situatën, njerëzit të përpiqen të zgjohen në të njëjtën kohë çdo mëngjes edhe kur janë me pushime, edhe ne rastet kur shkojnë në shtrat më vonë. Do të ishte gjithashtu e dobishme të kishin rituale relaksuese para gjumit, të tilla si leximi, shmangia e kafeinës dhe alkoolit rreth gjashtë orë para gjumit, kryejnë ushtrime më të rënda në mëngjes dhe ushtrime të lehta në mbrëmje.