Covid-19. Ja, si përhapet virusi në ambiente të mbyllura. Studimi italian

Nëpërmjet zhvillimit të një metode të re për marrjen e mostrave dhe analizimin e SARS-CoV-2 në ajër, është demonstruar se si mund të transmetohet virusi në ajër në ambientet e brendshme, jo vetëm nëpërmjet spërklave respiratore të mëdha. Këtë e ka zbuluar një studim i Agjencisë Rajonale për Mbrojtjen e Mjedisit në Piemonte (ARPAP) dhe i Universitetit të Torinos, botuar në revistën "Journal of Hazardous Materials".

Qendra Rajonale për Biologjinë Molekulare ARPAP, në bashkëpunim me Laboratorin e Virologjisë Molekulare dhe Kërkimeve Antivirale të Qendrës Universitare San Luigi Gonzaga në Orbasano, ka zhvilluar, testuar dhe vërtetuar një metodë për marrjen e mostrave dhe analizimin e SARS-CoV-2 në ajër, duke demonstruar drejtpërdrejt lidhjen midis emetimit të ngarkesës së njohur virale të një subjekti të infektuar dhe përqendrimeve relative të SARS-CoV-2 në ajër në kushte të kontrolluara, një demonstrim që nuk është ende i pranishëm në literaturën shkencore. Eksperimentet e kryera, përveç vërtetimit se virusi SARS-CoV-2 transmetohet nëpërmjet aerosolit përtej distancave të konsideruara prej kohësh si "të sigurta" (1-1,5 metra), konfirmuan gjithashtu ndikimin e ushtruar nga lloji i aktivitetit në lidhje me emetimin e aerosoleve virale dhe, për pasojë, përhapjen e tyre në mjedis: siç është parashikuar tashmë nga studimet e mëparshme, emetimet gjatë prodhimit të tingujve ose zhurmave me anë të organeve vokale, janë të një shkalle më të lartë sesa aktiviteti i thjeshtë respirator. Studiuesit vërtetuan gjithashtu një qasje të re teorike parashikuese që synon llogaritjen e përqendrimit të virusit në një mjedis të brendshëm, duke filluar nga emetimet e njerëzve të infektuar dhe karakteristikat e ventilimit të mjedisit. Mbi bazën e këtij mjeti modelimi mund të ndërtohen politika koherente në menaxhimin e mjediseve të brendshme dhe në përcaktimin e masave të kontrollit për të reduktuar rrezikun e infeksionit (për shembull, duke llogaritur zonën maksimale të mjediseve të zëna me njerëz dhe kohëzgjatjen maksimale të okupimit).

Drejtori i Laboratorit të Virologjisë Molekulare të Universitetit të Torinos, profesor David Lembo, nënvizon: "Tani, mund të pohojmë se virusi mund të transmetohet nga ajri në mjedise të mbyllura dhe jo vetëm përmes spërklave. Ky sukses i kërkimit italian do të bëjë të mundur aplikimin e metodave të zhvilluara edhe për studimin e viruseve të tjera të njohura respiratore dhe atyre që mund të shfaqen në të ardhmen". Këtë e thotë edhe profesor Giorgio Buonanno i Universitetit të Kasinos dhe Lacios Jugore: "Ne e kemi përsëritur këtë prej disa kohësh dhe tani kemi edhe prova për këtë. Virusi transmetohet nga ajri në mjedise të mbyllura", përfundon ai.

Këtu, maskat kirurgjikale, distancimi dhe vaksinat nuk janë të mjaftueshme për të parandaluar përhapjen e infeksionit, siç ka treguar më tej varianti Omicron. Por, ka kundërmasa të vlefshme tekniko-inxhinierike: ventilimi, reduktimi i emetimeve, menaxhimi i kohës së ekspozimit dhe grumbullimet, mund të zbusin rrezikun e infeksionit.