Covid-19 në hundë dhe fyt. Arsyet e infektueshmërisë më të madhe të Omicronit

Është zbuluar një nga mekanizmat që qëndron në themel të infektueshmërisë më të madhe të variantit Omicron, i cili ngulitet brenda qelizave të hundës dhe fytit. Kjo hipotezë konfirmohet nga një studim klinik i kohëve të fundit, i koordinuar nga Giuseppe Lippi, president i Shkollës së Mjekësisë dhe Kirurgjisë të Universitetit të Veronës, dhe u krye nga Gian Luca Salvagno, profesor i biokimisë klinike dhe drejtor i Laboratorit të Analizës në spitalin e Pederzolit, nga Martina Montagnana, profesoreshë e biokimisë klinike në universitet, në bashkëpunim me Brandon M. Henry, studiues në Institutin e Kërkimeve Biomjekësore të Teksasit në San Antonio. Ky hulumtim është publikuar në revistën shkencore ndërkombëtare Journal of Infection.

Hulumtimi tregon se si subjektet e infektuara me të ashtuquajturin variant afrikan të SARS-CoV-2 kanë një ngarkesë virale shumë të lartë në nazofaring, deri në katër herë më të lartë se ata të prekur nga variantet e mëparshme të Alfës dhe Deltës. Ky përqendrim i lartë në traktin e sipërm respirator do të funksiononte si një "barrierë", duke i dhënë mundësi sistemit imunitar ta luftonte virusin atje, duke e bërë më të vështirë kalimin e infeksionit në mushkëri.

"Pikërisht ngarkesa e lartë virale në nazofaring do të ndihmonte për të shpjeguar infektivitetin më të madh të vërejtur në shumë studime epidemiologjike të variantit Omicron - shpjegojnë studiuesit - si dhe përhapjen e tij intensive në rrethana të favorshme për infektim, për shembull gjatë grumbullimeve masive ku njerëzit nuk përdorin maska. Në të njëjtën kohë, demonstrimi i një kapaciteti superior replikues të virusit në traktin e sipërm respirator do të ndihmonte për të justifikuar ashpërsinë më të ulët të vërejtur te pacientët me infeksion të variantit Omicron, në krahasim me shtamet e mëparshme virale, pasi kjo do t'i jepte mundësi sistemit imunitar të reagonte më shpejt dhe në mënyrë efektive ndaj virusit, përpara se infeksioni të përhapej në mushkëri."