Long-Covid. Ja, cilat janë dëmtimet pulmonare një vit pas shërimit

Një studim i ri, i botuar në revistën Respiratory Research, ekzaminoi mushkëritë e pacientëve të shtruar në spital me pneumoni, një vit pas daljes nga spitali për COVID-19, për të shqyrtuar pasojat pulmonare afatgjata.

Në studim u përfshinë mbi 300 pacientë me pneumoni SARS-CoV-2, nga të cilët mbi 90% vazhduan të ndiqeshin deri në një vit. Përafërsisht, 60 pacientë u trajtuan vetëm me oksigjen shtesë, ndërsa 140 pacientë dhe 90 pacientë u trajtuan përkatësisht me ventilim të vazhdueshëm me presion pozitiv të rrugëve respiratore (CPAP) dhe ventilim mekanik invaziv (IMV).

Difuzioni alveolo-kapilar i monoksidit të karbonit (DLCO) u përmirësua me afërsisht 2.5% te pacientët e trajtuar me CPAP dhe IMV pas 6 dhe 12 muajsh, por ky përmirësim nuk u pa te pacientët e trajtuar me oksigjen të thjeshtë. Asnjë pacient nuk ka shfaqur ngopje të ulët me oksigjen, ose nuk kishte nevojë për oksigjen shtesë në fund të ndjekjes.

Në fund të monitorimit, rreth 40% e pacientëve ish-Covid-19 raportuan një marrje fryme të lehtë gjatë përpjekjeve, ndërsa 34 pacientë raportuan se duhej të ecnin ngadalë ose të ndalonin për të marrë frymë. Pati një rritje në raportet e dispnesë në të gjitha grupet, megjithëse kjo nuk ishte domethënëse. Asnjë nga pacientët nuk kishte nevojë për programe rehabilitimi pulmonar.
Anomalitë radiologjike janë vërejtur në 80% të pacientëve me IMV, në 65% me CPAP dhe 46% të grupit vetëm me oksigjen. Shumica e skanimeve CT me rezolucion të lartë (HRCT) treguan ndryshime intersticiale; nga të cilat mbi gjysma shfaqën një xham të smeriluar opak dhe mbi një e treta, kishte anomali retikulare. Në 44%, opaciteti u shoqërua me bronkektazi ose bronkektazi nga tërheqja. Mes pacientëve me DLCO normale, gati 60% kishin anomali të HRCT-së, por kur DLCO-ja u komprometua, shkalla e anomalive radiologjike u rrit në 77%.

Këto rezultate tregojnë se fibroza pulmonare është një pasojë e rrallë e SARS-CoV-2 (më pak se 1%) dhe se shumica e rasteve shfaqin kryesisht anomali të vogla në analizat e HRCT-së.

Për studiuesit, këto evidenca të dëmtimit pulmonar vërtetojnë idenë se pacientët duhet të vazhdojnë të ndiqen për periudha të gjata pas daljes nga spitali për të parandaluar dhe trajtuar pasojat pulmonare që vijnë nga long-Covid.