Long-Covid mund të zgjasë më shumë nga sa supozohet. Ja, cilat janë simptomat pas dy vitesh

Në një studim të publikuar në The Lancet Respiratory Medicine, studiuesit me në krye Lixue Huang nga Universiteti Mjekësor i Pekinit, studiuan shëndetin e 1192 pacientëve të infektuar me Covid në Wuhan ndërmjet periudhës 7 janar-29 maj 2020 gjatë asaj që u konsiderua si vala e parë e infeksionit.

Pacientët iu nënshtruan disa ekzaminimeve dhe pyetësorëve mjekësorë, të cilët u zhvilluan në tre seanca, e para pas 6 muajsh nga infektimi, e dyta pas një viti dhe e fundit pas dy vitesh. Testet konsistuan në matjen e shpejtësisë mesatare dhe distancës së përshkuar në një shëtitje 6-minutëshe, kryerjen e analizave të gjakut dhe një seri pyetësorësh mbi cilësinë e jetesës dhe simptomat e vetë-raportuara. Një grup pacientësh iu nënshtruan testeve të funksionit pulmonar dhe radiografive të gjoksit në çdo vizitë pasuese. Rezultatet më pas u krahasuan me ato të 3,383 personave që nuk kishin pasur Covid-19. Për më tepër, gjatë vizitave 12-mujore dhe 2-vjeçare, përmes një pyetësori të posaçëm, u pyetën se sa herë kanë pasur nevojë për kujdes shëndetësor te specializuar.

Përveç kësaj, në vizitën përfundimtare pas 2 vitesh, pacientët plotësuan gjithashtu një sërë pyetësorësh psikiatrikë që synonin vlerësimin e shëndetit mendor, çrregullimit të ankthit të përgjithësuar (GAD-7) dhe çrregullimit të stresit post-traumatik.

Pas 6 muajsh nga shërimi, 68% e pacientëve shfaqën një ose më shumë simptoma të long Covid-it (lodhje, gulçim, konfuzion mendor, etj.).

Pas dy vitesh, më shumë se gjysma e pjesëmarrësve (55%) vazhdonin të kishin probleme shëndetësore të lidhura me infeksionin. Simptomat më të zakonshme ishin lodhja dhe dobësia e muskujve (31%) dhe vështirësia për të fjetur (31%). 26% e të mbijetuarve të Covid-it kishin vështirësi në frymëmarrje (të vlerësuara në bazë të shkallës së dispnesë të miratuar në praktikën klinike) 6 muaj pas infektimit, dhe rreth 14% e pjesëmarrësve shfaqën të njëjtin çrregullim edhe pas dy vitesh.

Krahasuar me grupin e kontrollit, pacientët që kishin ende simptoma të Covid-it 2 vite pas infektimit kishin një cilësi më të ulët të jetesës, qëndrueshmëri më të pakët në ushtrime, probleme më të mëdha të shëndetit mendor dhe kërkonin më shpesh ndihmë shëndetësore të specializuar. Ankthi dhe depresioni ishin gjithashtu më të përhapura në grupin Covid.

Përveç kësaj, studiuesit zbuluan se më shumë këto simptoma u shfaqën te pacientët që kishin nevojë për mbështetje të nivelit më të lartë të frymëmarrjes (oksigjen, mbështetje mekanike të frymëmarrjes, kujdes intensiv) gjatë shtrimit në spital.

Studiuesit tani po përpiqen të zbulojnë karakteristikat e këtyre pacientëve për të kuptuar nëse ka faktorë predispozues për një Covid kaq të zgjatur dhe për të parë nëse terapitë ose programet e rehabilitimit janë të mundshme për të zbutur efektet e sëmundjes në afat të gjatë.

Për më shumë informacion:

Health outcomes in people 2 years after surviving hospitalisation with COVID-19: a longitudinal cohort study. Lixue Huang, MD; Xia Li, MD; Xiaoying Gu, PhD; Hui Zhang, MD; LiLi Ren, PhD; Li Guo; PhD et al. The Lancet May 11, 2022