Këshillat që stomatologët duhet t'i japin pacientëve përpara se të nisen për pushime

Një studim gjerman i publikuar së fundi ka konfirmuar se edhe dhëmbët mund të vuajnë nga nxehtësia. Në studim është hetuar korrelacioni ndërmjet problemeve dentare dhe kushteve të motit, duke demonstruar një incidencë më të lartë të absceseve dentare në rastet kur temperaturat janë më të larta.

Nxehtësia dhe ekspozimi i zgjatur në diell, në fakt, mund të lehtësojnë përhapjen e baktereve, shfaqjen e inflamacionit dhe për rrjedhojë edhe dhimbjen e papritur të dhëmbit ose dhimbjen e gengivave. Megjithatë, nuk është vetëm termometri i jashtëm ai që ndikon në gjendjen e gojës gjatë periudhës së verës.

Në fakt, rutina e përditshme pëson disa ndryshime: për shembull, konsumohen më shumë pije të ftohta dhe ushqime me sheqer, të cilat mund të çojnë në prishje të dhëmbëve dhe inflamacion. Përveç kësaj, higjiena e gojës shpesh neglizhohet gjatë pushimeve, pasi pasta dhe furça e dhëmbëve nuk përdoren gjithmonë pas çdo vakti.

Janë të shumtë faktorët që mund të ndikojnë në shëndetin oral, i cili nuk duhet lënë kurrë në hije, edhe gjatë pushimeve verore.

Për këtë arsye, Giuseppe Ramundo (Akademia Italiane e Osseointegrimit) ka hartuar një manual të përbërë nga disa rregulla që duhen ndjekur për të ruajtur dhëmbët gjatë pushimeve.

Vizitë te dentisti

Karrigia e dentistit është një ndër vendet që duhet të "vizitohet" të paktën një muaj para nisjes, në mënyrë që profesionisti të vlerësojë situatën, të diagnostikojë çdo problem të pashfaqur dhe t'i zgjidhë ato menjëherë me terapitë më të përshtatshme.

Higjiena orale

Gjatë pushimeve, pushimi dhe ndryshimi i rutinës sigurisht që është i lejuar dhe i domosdoshëm, por ka një zakon që nuk duhet neglizhuar kurrë: higjiena e gojës në shtëpi. Është mirë të zbatohet në mënyrë korrekte, si për nga frekuenca, ashtu edhe për sa i përket kohës që i duhet kushtuar larjes së dhëmbëve, bazuar në sugjerimet e dentistëve.

Ujë, ujë dhe sa më shumë ujë

Pirja e ujit ndihmon në sigurimin dhe prodhimin normal të pështymës, burimi i parë i mbrojtjes natyrore antibakteriale. Në anën tjetër, pakësimi i pështymës favorizon qëndrueshmërinë e sheqernave apo substancave acide në zgavrën e gojës.

Akulli: është më mirë të lihet në frigorifer

Në verë, t'i rezistosh tundimit të një pije të ftohtë nuk është e lehtë. Megjithatë, është e rëndësishme shmangia e pijeve dhe ushqimeve shumë të ftohta, sepse ato janë burim acarimi, veçanërisht për personat që vuajnë nga ndjeshmëria dentare. Dhëmbët në fakt mund të pësojnë trauma termike të cilat, nga ana tjetër, mund të shkaktojnë dhimbje në pulpë, indi që zakonisht quhet "nervi i dhëmbit". Përtypja e akullit ose e substancave të forta është një veprim i gabuar që mund të shtojë edhe traumën mekanike në traumën termike, dhe të bëhet një shkak i mundshëm për fraktura.

Kujdes në tavolinë

Duke qenë një se janë një ushqim i shkëlqyer për bakteret që jetojnë në brendësi të gojës, pijet dhe ushqimet me acid dhe sheqer duhet të kufizohen, veçanërisht nëse nuk është e mundur të lahen dhëmbët në orët në vijim. Zëvendësues të përkohshëm të furçës së dhëmbëve mund të jenë çamçakëzët me ksilitol pa sheqer që stimulojnë pështymë ose spërkatje alkalizuese të bazuara në kripëra minerale dhe bikarbonate, të cilat, edhe pse për një periudhë të kufizuar, kundërveprojnë aciditetin e ushqimeve, duke e kthyer gojën në një gjendje të sigurt, me një vlerë të përshtatshme pH.

Kujdes nga sporti

Praktikimi i sportit është sigurisht i rëndësishëm për shëndetin, por në disa kontekste mund të jetë i rrezikshëm për zgavrën e gojës. Për adhuruesit e aktivitetit fizik në natyrë, një pllakë mbrojtëse mund të ndihmojë në ruajtjen e buzëqeshjes në rast traume, gjithmonë me sugjerimin e dentistit.

Kompleti perfekt i udhëtimit

Furçë dhëmbësh cilësore, fill dentar, furçë interdentare dhe pastë dhëmbësh desensibilizuese me fluor: janë produktet bazë që nuk duhet harruar në valixhen tuaj. Për ata që i përdorin, nuk duhet të harrojnë kurrsesi maskerinat transparente në shtëpi. Së fundi, në raste të veçanta, komplete më specifike mund të jenë të dobishme, duke përfshirë instrumentet e dobishme për çimentimin e urave dhe kurorave, por edhe barna të tilla si: qetësues kundër dhimbjeve, antiseptikë dhe antibiotikë, që duhet të përdoren gjithmonë sipas udhëzimeve të mjekut.

Stomatologë dhe sigurime

Në listën e kontrollit para nisjes nuk mund të mungojë kërkimi i një qendre dentare të hapur gjatë pushimeve dhe sigurimi që mbulon edhe shpenzimet dentare në rast udhëtimi jashtë vendit, për të kaluar pushimet verore pa probleme. Det, mal apo qytet, me ndihmën e specialistit është e mundur që gjithçka të jetë nën kontroll pavarësisht vendndodhjes.