Bakteret e zgavrës së gojës janë të rrezikshme edhe për zemrën

Bakteret e zgavrës orale që arrijnë të hyjnë në fluksin e gjakut mund të jenë vërtetë shumë të rrezikshme sepse zotërojnë "dredhi" që i zbatojnë për të mashtruar sistemet e mbrojtjes së organizmit. Këtë e ka shpjeguar Helen Petersen, kërkuese në Eastman Dental Institute e University College London në Britaninë e Madhe.

Kërkimet lidhen në veçanti me bakterin Streptococcus gordonii, që gjendet normalisht në zgavrën orale dhe kontribuon në formimin e pllakës, por që sapo hyn në fluksin e gjakut mund të shkaktojë koagula hematike. Kërkuesit kanë përshkruar procesin në të cilin kryhet kjo, duke shpjeguar që bakteri është në gjendje të prodhojë në sipërfaqen e tij një molekulë që "imiton" fibrinogjenin, një faktor koagulant, duke arritur kështu të aktivizojë pllakëzat që grupohen në enën e gjakut duke formuar koagulën. Bakteri, për më tepër, mbetet në brendësi të koagulës ku mbrohet qoftë nga mekanizmat e mbrojtjes së sistemit imunitar qoftë nga antibiotikët.

"Jemi duke studiuar procesin që përcakton këtë seri ngjarjesh me shpresën se do të zhvillohen barna të reja që janë në gjendje të parandalojnë koagulat dhe endokarditin infektiv. Në zhvillimin e endokarditit, në fakt, aftësia e baktereve për të aderuar në valvulat kardiake dhe për të aktivizuar pllakëzat që formojnë koagulën është një kalim vendimtar. Grupi ynë tashmë ka identifikuar elementet e molekulës që imiton fibrinogjenin: për këtë mund të themi që po i afrohemi mundësisë për të identifikuar substanca të reja që mund të inhibojnë veprimin" - ka thënë kërkuesja.