Long-Covid. Kohëzgjatja e simptomave dhe rreziku për sëmundje autoimune

Një studim i publikuar në European Respiratory Journal me autor kryesor Manali Mukherjee nga Universiteti McMaster në Kanada, ka arritur në përfundimin se pacientët me long Covid, nëse vazhdojnë të kenë simptoma për më shumë se 12 muaj, ata janë të prirur të zhvillojnë një reaksion autoimun.

Lajmi i mirë është se tre nga katër pacientë shërohen nga Long Covid brenda një viti pas infektimit.

Ekspertët studiuan 106 pacientë të cilët ishin shëruar nga Covid dhe dy grupe kontrolli që nuk ishin të infektuar. Në tre raste në 3, 6 dhe 12 muaj pas shërimit, pacientët u pyetën nëse kishin vështirësi në frymëmarrje, kollë ose lodhje (simptoma tipike të long Covid).

Studiuesit analizuan gjithashtu gjakun e të gjithë kampionit për të kontrolluar praninë e antitrupave të veçantë, të ashtuquajturat autoantitrupa, pra ato që prekin qelizat dhe indet e shëndetshme të trupit, të cilat shkaktojnë sëmundje autoimune. Pothuajse 80% e të shëruarve nga Covid-19 kishin dy ose më shumë nga këto antitrupa në gjakun e tyre në 3 dhe 6 muaj pas infektimit. Përqindja ra në 41% pas një viti. Shumica e pjesëmarrësve të shëndetshëm nuk kishin autoantitrupa.

Studiuesit zbuluan gjithashtu se dy "autoantitrupa" specifikë (të quajtur U1snRNP dhe SSb-La), së bashku me proteinat që shkaktojnë inflamacion (citokina), vazhduan në rreth 30% të pacientëve të shëruar pas një viti, veçanërisht për pacientë me long Covid.

"Shumica e pacientëve në studimin tonë, edhe nëse kishin autoantitrupa menjëherë pas infektimit, u shëruan plotësisht pas 12 muajsh", shpjegon Mukherjee. Edhe pse, për pacientët me long Covid për më shumë se një vit, autoantitrupat vazhdojnë.

"Rezultatet tregojnë nevojën për të kontrolluar shenjat e sëmundjes autoimune te pacientët me long Covid që zgjat për një vit ose më shumë. Studimi i këtyre pacientëve do të vazhdojë edhe për një vit tjetër për të parë se si ndryshojnë nivelet e autoantitrupave për një periudhë afatgjatë" përfundon autori.