1 në 4 fëmijë me probleme të kavitetit. Stomatologët: Fëmijët kanë nevojë të orientohen saktë për higjienën

Një në katër fëmijë ka probleme të kavitetit dentar si pasojë e higjenës jo të mirë dhe mungesës së kontrolleve periodike. Këto janë të dhënat paraprake të depistimit që po kryhet në zonat periferike të Tiranës nga kabinetet dentare të lëvizshme që ka vënë në dispozicion Ministria e Shëndetësisë. Fëmijët janë të ndërgjegjshëm për t'u kujdesur për dhëmbët, por te dentisti shkojnë kur kanë probleme dhe jo për kontrolle rutinë. Në periferi të Tiranës fëmijët thonë se kujdesen për higjienën duke i larë dhëmbët të paktën një herë në ditë.

"Unë i laj vetëm në mëngjes dhëmbët dhe jo çdo ditë", shprehet një prej nxënësve.

Prej dy javësh në shkollat e periferisë e Tiranës kanë nisur punën dy kabinete dentare të levizshme të cilët po ofrojnë fillimisht shërbim depistues. Stomatologët konstatojnë se 1 në 3-4 fëmijë ka probleme me kavitetin dhe ndonjë dhëmballë, ndërsa mënyra e mbajtjes së higjienës kërkon orientim të saktë.

"Kanë probleme dhe duhen orientuar. Kanë probleme me kavitetin i cili fatmirësisht është në fazë të moderuar. Ne do të kryejmë edhe profilaksi te fëmijët pasi është e nevojshme. Kjo do të thotë se duhet të bëjmë pastrim të gurëzave dhe fluorizim, pasi kështu ndihmojmë në mbrojtjen e dhëmbëve", shprehet mjekja stomatologe.

Aktualisht në shkollat vendit janë 19 njësi të reja dentare, ku vetëm 10 prej tyre ndodhen në Tiranë. Në këto njësi kryehen vetëm kontrolle depistuese për parandalimin e sëmundshmërisë.

Alma Demiraj