Rreth 366 stomatologë që nuk plotësuan numrin e detyrueshëm të krediteve duhet t'i nënshtrohen provimit të ricertifikimit. Por, sipas Qendrës Kombëtare të Edukimit në Vazhdim do të përjashtohen nga detyrimi i dhënies së provimit të gjithë ata që e kanë marrë lejen e ushtrimit të profesionit pas datës 1 janar 2012, si dhe të punësuarit në shërbimin publik që ju mbeten edhe 2 vjet ose më pak për të mbushur moshën e pensionit.

Ndërkaq Urdhrat e Profesionistëve nuk janë njoftuar ende nga Ministria e Shëndetësisë mbi mjekët, dentistët dhe farmacistët me 0 kredite të cilët ndonëse do ta japin provimin e ricertifikimit, do t'u shpallet vendi vakant. Lidhur me këtë vendim të ministrisë, Urdhrat kanë kërkuar një masë tjetër më të lehtë si p.sh. uljen e pagës së këtyre profesionistëve dhe jo largimin e detyrueshëm nga puna, por ende nuk dihet se ç'drejtim do të marrë situata.

Fakultetit i Mjekësisë Dentare ka përgatitur dhe publikuar programin orientues të provimit të ricertifikimit, të cilin të gjithë të interesuarit mund ta gjejnë në seksionin Download Center. Paraprakisht Dekani i Fakultetit të Mjekësisë Dentare, dr.prof. Fejzi Keraj është shprehur se "testimi do të ketë karakter klinik dhe jo një rishikim të të gjithë literaturës stomatologjike. Pra do të përfshijë fushën klinike me të cilën stomatologu përballet çdo ditë dhe kjo do të jetë kërkesa jonë fillestare ndaj këtyre profesionistëve".