Ndonëse Urdhri i Stomatologut është ngritur ligjërisht, ende nuk ka nisur të funksionojë. Shkak vijon të jetë buxheti dedikuar këtij institucioni, i cili nuk është mundësuar ende nga Ministria e Shëndetësisë. Sipas ligjit nr. 127 datë 02.10.2014 "Për Urdhrin e Stomatologut në Republikën e Shqipërisë", buxheti për këtë ent publik, vitin e parë të funksionimit të tij jepet nga Ministria e Shëndetësisë, ndërsa në vitet në vazhdim mblidhet nga kontributet e stomatologëve.

Dentist33.al u interesua sërish lidhur me nisjen e funksionimit të USSH dhe presidenti i tij, Dr. Nikoll Deda i zgjedhur vetëm një muaj më parë, na dha këtë përgjigje: "Deri tani kemi kryer aktet bazë për themelimin e Urdhrit të Stomatologut. Presim fillimin e muajt (qershor) për çeljen e buxhetit dhe marrjen e ambienteve për selinë ku do të vendoset Urdhri. Çelja e buxhetit na mbajti peng shumë kohë. Sapo institucioni i USSH të fillojë nga funksionimi i të gjithë strukturës do t'ju informojmë".

Që nga fillimi i këtij viti puna për krijimin e strukturave të Urdhrit të Stomatologut ka qenë e shpejtë. U përmbyllën me sukses disa nga fazat kryesore për ngritjen e tij, që nga zgjedhja e Këshillit Kombëtar, te formimi këshillave rajonalë e deri në zgjedhjen e Presidentit. Por duket se i gjithë procesi për vënien në zbatim të funksioneve tw Urdhrit si ent në shërbim të të drejtave dhe detyrimeve të profesionistëve që përfaqëson ka ngecur te buxheti.