| 3 Qershor 2015 |

Një projekt për administrimin e mbetjeve spitalore dhe të klinikave private në 6 qytete të vendit

Skandali që pak kohë më parë përfshiu menaxhimin e mbetjeve të spitaleve dhe subjekteve private ka nxitur nisjen e një projekti ndërgjegjësimi lidhur me monitorimin e këtij aktiviteti tejet delikat për mjedisin dhe shëndetin e popullatës.

Skandali që pak kohë më parë përfshiu menaxhimin e mbetjeve të spitaleve dhe subjekteve private ka nxitur nisjen e një projekti ndërgjegjësimi lidhur me monitorimin e këtij aktiviteti tejet delikat për mjedisin dhe shëndetin e popullatës. I emërtuar "Së bashku të marrim përsipër përgjegjësitë për administrimin e mbetjeve", projekti i qendrës "Centers for Research Cooperation and Developement" financohet nga qeveria suedeze dhe zbatohet në bashkëpunim me spitalet dhe subjektet private në 6 qytetet më problematike të tilla si: Tiranë, Elbasan, Vlorë, Berat, Shkodër dhe Fushë-Krujë.
Qëllimi i projektit të CRCD-së në Shqipëri është asistimi i subjekteve prodhuese të mbetjeve në mënyrë që të zbatojnë siç duhet rregulloren për administrimin e tyre. Vendosja e posterave informuese në ambientet e spitaleve dhe klinikave do të ndihmojë në orientimin e duhur të personelit përgjegjës për administrimin sa më të mirë të kësaj kategorie mbetjesh. Po ashtu, do të zhvillohen diskutime të hapura mbi problemin e administrimit gjithashtu organizatorët do të asistojnë në kohë personelin për kuptimin dhe zbatimin korrekt të rregullores.
Spitalet, poliklinikat, qendrat shëndetësore, klinikat dentare dhe klinikat veterinere janë prodhuesit e mbetjeve të rrezikshme. Në Shqipëri vetëm tri kompani kanë leje për trajtimin e mbetjeve spitalore dhe ndaj dy prej tyre Inspektorati Sanitar Shëndetësor vendosi gjoba dy muaj më parë pasi nuk kishin ndjekur procedurat për administrimin e duhur të mbetjeve. Në vendin tonë prodhohen mbi 2 mijë ton mbetje spitalore në vit dhe pjesa më e madhe e madhe e tyre hidhen në zona të banuara. Për asgjësimin e një kilogrami mbetjesh, spitalet dhe klinikat private duhet të paguajnë një tarifë prej 400 lekësh.