USSH: 378 stomatologë me 0 kredite. Provimi i ricertifikimit një mundësi më shumë që të provojnë njohuritë e tyre

Lista përfundimtare e stomatologëve që shlyen detyrimet e Programit të Ricertifikimit është publikuar që në maj por mbetet aktual shqetësimi i rreth 700 stomatologëve të tjerë me kredite të paplotësuara, prej të cilëve 378 rezultojnë më 0 të tilla.

Lista përfundimtare e stomatologëve që kanë shlyer detyrimet e ricertifikimit është publikuar që në maj por mbetet aktual shqetësimi i rreth 700 stomatologëve të tjerë me kredite të paplotësuara, prej të cilëve 378 rezultojnë më 0 kredite. Këto të dhëna i marrim nga Urdhri i Stomatologut, i cili po përgatitet për t'i ndjekur këta profesionistë në provimin e ricertifikimit që duhet ta japin në vjeshtë. Sipas kreut të USSH-së, Dr. Nikoll Dedës, provimi nuk është projektuar për t'i mbetur stomatologët, por për t'iu ofruar një mundësi të re që ata të provojnë njohuritë e tyre. "Ne si Urdhër do të krijojmë raporte me të gjitha institucionet për t'i ardhur në ndihmë profesionistëve që përfaqësojmë. USSH do të bashkëpunojë me Qendrën Kombëtare të Provimeve, Qendrën Kombëtare të Edukimit në Vazhdim dhe Fakultetin e Mjekësisë Dentare për stimulimin dhe rritjen e standardit të shërbimit të stomatologëve në vend", pohon z.Deda. Nga ana tjetër, ashtu si kreu i Urdhrit të Mjekëve, ai pohon se fakti që profesionistët nuk i plotësuan dot 100 kreditet e nevojshme në 5 vite është edhe pasojë e informimit të mangët që në nisje të programit në 2010-ën. "Mjekët stomatologë ndiqnin aktivitetet e ndryshme të akredituara, por nuk i regjistronin pikët e marra në QKEV sepse nuk kishin informacion që një ditë do të penalizoheshin për shkak të mosplotësimit të 20 krediteve në vit. Mos sensibilizimi i duhur që në fillim të programit ka sjellë në një situatë të tillë", shprehet z.Deda.
Në rregulloren e Ministrisë së Shëndetësisë parashikohet se profesionistët me 0 kredite mund të rifitojnë lejen e ushtrimit të profesionit vetëm nëse arrijnë të paktën 50% të pikëve maksimale në provimin e ricertifikimit që pritet të jepet deri në tetor të këtij viti, ndonëse datat nuk janë publikuar ende nga Agjencia Kombëtare e Provimeve. Ndërkaq Fakulteti i Mjekësisë Dentare ka përgatitur programin e provimit të ricertifikimit. Në Download Center gjeni programin orientues të tij.