Fatura fiskale: Në sitë të gjitha klinikat stomatologjike dhe kompanitë e pajisjeve dentare

Lufta kundër informalitetit në shëndetësi përveç farmacive, kompanive farmaceutike, klinikave shëndetësore jo publike do të kontrollojë edhe klinikat stomatologjike. Aksioni do të fokusohet jo vetëm për lëshimin e faturës fiskale për pacientët por edhe në materialet dentare që ata përdorin te pacien

Alma Demiraj

Lufta kundër informalitetit në shëndetësi përveç farmacive, kompanive farmaceutike, klinikave shëndetësore jo publike do të kontrollojë edhe klinikat stomatologjike. Aksioni do të fokusohet jo vetëm për lëshimin e faturës fiskale për pacientët, por edhe në materialet dentare që ata përdorin te pacientët. Futja e këtyre materialeve deri më tani ka qenë plotësisht jashtë kontrollit, e lënë në ndërgjegjen e kompanive dhe dentistëve.
I ftuar në takimin me kryeministrin e vendit kur dhe u lançua aksioni kundër informalitetit në shëndetësi, kreu i shoqatës së distributorëve të pajisjeve dentare, z.Enton Mele, vlerësoi nismën si një mekanizëm për të legalizuar këtë biznes dhe për të luftuar konkurrencën e pandershme. Ai kërkoi krijimin e një kuadri ligjor të munguar.
"Vlerësojmë me rëndësi për rritjen cilësore në shërbimin stomatologjik në Shqipëri, krijimin e një kuadri ligjor që të garantojë cilësinë e materialeve që importohen, si dhe të bëhet seleksionimi i subjekteve tregtare që kanë infrastrukturën dhe kualifikimin e duhur për të kryer këtë veprimtari. Është qesharake të pretendosh turizëm dentar kur nuk ke të garantuar me ligj të paktën cilësinë e materialeve.
Kërkohet bashkëpunim i strukturave ligjzbatuese për kontrollet doganore me shtetet kufitare për të reduktuar mallrat e padeklaruar", u shpreh z.Mele.

Pajisjet e implantueshme nuk janë vetëm implantet dentare, por gjithçka që rri në trup jo më pak se 30 dite. Që do të thotë, të gjithë materialet protetike dhe ortodoncia fikse. Sipas zotit Mele, kjo është një masë që do të reduktojë informalitetin në fushën e importeve stomatologjike dhe më në fund do bëjë të mundur zbatimin e plotë të një ligji të miratuar që në janar.