Mjekë dhe dentistë të shqetësuar për mospërfshirjen në listat e kreditimit të QKEV, ja përgjigja

Pasi Dentist33 publikoi dje listën e stomatologëve me detyrim minimal të përmbushur për vitin 2015, disa prej tyre kontaktuan në redaksinë tonë duke shprehur shqetësimin se nuk rezultonin në këtë listë ndërkohë që numrin e detyrueshëm të krediteve e kishin plotësuar dhe tejkaluar.

Për t'iu përgjigjur shqetësimit të tyre, u interesuam sot pranë Qendrës Kombëtare të Edukimit në Vazhdim dhe pyetëm shefen e Sektorit të Akreditimit, znj. Suzana Zeraliu.

"Sa i takon listës së mjekëve, farmacistëve dhe dentistëve të cilët kanë plotësuar detyrimin minimal për vitin 2015, QKEV është duke e përditësuar atë muaj pas muaji. Pra lista e publikuar disa ditë më parë në faqen tonë është ajo me të dhënat e përpunuara në muajin mars. Së shpejti do të nxjerrim listën e azhornuar. Gjithashtu profesionistët për çdo shqetësim të tyrin lidhur me kreditet mund të kontaktojnë drejtpërdrejt QKEV-në", u shpreh znj. Zeraliu.

Dentist33.al sqaron se informacionin servirur lexuesit e mbështet në dokumente të publikuara në faqet zyrtare të institucioneve përkatëse, në rastin në fjalë, në Raportin e Edukimit në Vazhdim për vitin 2015 të QKEV-së dhe listat bashkëshoqëruese të tij./D.Gj.