CAD CAM në klinikë dhe në laborator. Ja cili është opinioni i "babait" të kësaj teknologjie

Prof. François Duret është "babai" i një teknologjie që është bërë pjesë integruese e stomatologjisë moderne: CAD CAM - i dentar.
Në vitin 1970, në moshën 22 vjeçare ai filloi studimet që e çuan pas një dekade në realizimin e gjurmës së parë optike të një elementi dentar të përgatitur. Figura e tij është shumë e njohur në Evropë dhe Amerikë për shkak të kontributit që ai ka dhënë në kërkimin mjekësor si dhe për mësimdhënien në Universitetin e Kalifornisë Jugore (Los Angelos, CA).

Sipas prof. Duret avantazhet e CAD CAM në stomatologji janë si më poshtë:
1) Transformon të gjithë elementët dentarë në imazhe virtuale mbi të cilat mund të aplikohet një përpunim dixhital dhe mund të kemi përfitime pra nga të gjitha instrumentet e ofruara sot nga kompjuteri nga ana diagnostikuese dhe dizenjuese e punimeve.
2) Skanimi që bëhet në fillim të zinxhirit të përpunimeve të të dhënave nuk është i ndjeshëm nga ndryshimet mjedisore dhe lejon ruajtjen dhe riprodhimin në pafundësi.
Duhet të kemi parasysh që software të modelimit dhe prodhimit janë përgjigjet klinike ndaj një problemi të shëndetit të njeriut.
3) Do të pasurojë në stomatologji metodikat e "Sistemeve Eksperte" që gjejnë aplikimin e tyre në klinikat e "Inteligjencës Artificiale". Akoma janë pak të inkorporuar në fushën e specialitetit tonë por në vitet në vazhdim do të kenë një zhvillim të madh.
4) Thjeshtësimi i procedurave klinike, me reduktimin e kohëve dhe kostove të trajtimit janë një avantazh për pacientin.

Përsa i përket disavantazheve prof. Duret thotë që është e vështirë për të të diskutojë për disavantazhet duke qenë se ka luftuar gjithë jetën e tij kundër opinioneve negative duke kërkuar t'i kundërshtojë pikë për pikë.
Kritikat "historike" ndaj metodikës janë dy por që po zhduken me kalimin e viteve:
1) Kosto e aparaturave ndjek rregullat e tregut të sistemeve informatike dhe ka si tendencë të reduktohet në mënyrë progresive.
2) Koha e mësimit të procedurave klinike është shkurtuar dhe sot profesionisti mund të arrijë një nivel të mirë të të mësuarit në kohë të reduktuara. Problemi do të zhduket me shpejtësi sapo të gjithë Universitetet Franceze të futin CAD CAM - in dentar në lëndët shkollore. Deri më sot janë 5 universitete franceze që e garantojnë këtë formim.

Tashmë teknologjia e CAD CAM është bërë shumë e rëndësishme për klinikat dhe laboratorët dentarë dhe po përhapet me shpejtësi në të gjitha strukturat dentare (klinika dhe laboratorë të vegjël apo të mëdhenj). Në Francë janë 60% e laboratorëve që e përdorin këtë teknologji. Metrologjia na mëson që matja pa kontakt është shumë më e saktë për objektet. Në botën stomatologjike po shohim një bashkim progresiv midis rrezatimeve jo penetruese të gjurmës optike dhe atyre penetruese të radiologjisë. Kjo shkrirje respektivisht midis STL dhe DICOM po përdoret në ditët e sotme për diagnostikimin kirurgjik dhe projektimin e protezave dhe do të zëvendësojë gjatë 15 viteve të ardhshme gjurmët që merren me atë të kontaktit si dhe ato dixhitale tradicionale.

Nën kujdesin e: Davis Cussotto, stomatolog profesionist i lirë

Përktheu: Valbona Spahia