Raporti i dentistëve me pacientët. FDI ka nxjerrë 9 pika për të ripohuar misionin e dentistit ndaj pacientit

Objektivi final i dentistit, ashtu si në të gjithë mjekësinë, është përmirësimi i vazhdueshëm i shëndetit dhe mirëqenies së personave. Për ta arritur, përveç përmirësimit të kompetencave personale në teknikat e trajtimit, në parandalim dhe në kërkim, dentistët duhet të forcojnë dhe të menaxhojnë në mënyrë deontologjike raportin e tyre me pacientët, sipas paradigmës së pranuar tashmë që është pikërisht në pacientë të veçantë që duhet të përqendrohet kujdesi.

Në këtë prizëm FDI - ja, federata që përfaqëson mbi 1 milion dentistë të regjistruar në sindikata dhe Urdhrat e stomatologut nëpër të gjithë botën, ka nxjerrë një politikë që i drejtohet të gjithë profesionistëve që përfaqëson si edhe Qeverive.

Përgjegjësia dhe impenjimet që duhet të marrin të gjithë dentistët janë si më poshtë:
1. Të sigurohen se është respektuar e drejta themelore e pacientit për ta zgjedhur lirisht dentistin e tij.
2. Të punohet gjithmonë për të përmirësuar interesin e pacientit, pa ndonjë diskriminim në termat e "aksesit në trajtime" dhe në "trajtimet e nevojshme".
3. Të mos lejohet që ndikime të mundshme të jashtme (komerciale ose jo) të mbizotërojnë në përgjegjësitë profesionale dhe mbi lirinë e praktikës stomatologjike.
4. Të sigurohen trajtime me cilësi në mënyrë kompetente, në një ambient të sigurt dhe të mbrojtur; dentistët duhet të sigurojnë vetëm trajtimet për të cilat kanë kualifikimet dhe kompetencat e nevojshme, të cilat duhet të përditësohen rregullisht gjatë gjithë jetës së tyre profesionale.
5. T'i sigurohen pacientit të gjitha informacionet e nevojshme, duke përfshirë kostot e trajtimit, për të lejuar që ai të marrë pjesë në procesin e vendimmarrjes.
6. Të renditen dhe të shpjegohen me qartësi mundësitë e trajtimeve alternative me qëllim që të merret konsensusi i pacientit.
7. T'i njihet pacientit e drejta për të pasur pikëpamjen e tij përsa i përket trajtimit dhe nëse dëshiron, të kërkojë një mendim të dytë profesional.
8. Të garantohet konfidencialiteti në lidhje me informacionet mjekësore dhe dentare.
9. T'i lihen në dispozicion pacientit kartelat e tij klinike.

Odontoiatria33

Përktheu: Valbona Spahia