Gingivat dhe diabeti, një lidhje që vë në rrezik shëndetin e pacientëve. Këshillat nga SIdP me rastin e Ditës Botërore të Diabetit

Sot është Dita Botërore e Diabetit. Sëmundja parodontale dhe Diabeti janë të lidhura nga një fill i kuq që e bën njërën shkak dhe pasojë të tjetrës.
SIdP me rastin e Ditës Botërore të Diabetit i bën thirrje të gjithë personave dhe sidomos pacientëve me diabet të kontrollojnë shëndetin e gingivave dhe këshillon personat që kanë një parodontit të kontrollojnë më shpesh gliceminë dhe hemoglobinën e glikuar (tregues për kontrollin glicemik).

"Diabetikët kanë një probabilitet më të lartë për të vuajtur edhe nga parodontit dhe i përgjigjen më keq trajtimeve stomatologjike, sidomos nëse nuk kemi një kontroll të mirë të glicemisë" - shpjegon Claudio Gatti, president i SIdP - "Diabetikët kanë një reagim të ndryshëm ndaj baktereve, midis të cilave gjenden ato që janë përgjegjëse për gingivitin dhe parodontitin të pranishëm në pllakën që depozitohet rreth dhëmbëve; përveç kësaj mediatorë të ndryshëm të rritur në rastin e diabetit, si radikalet e lira dhe citokinet, mund të rritin inflamacionin edhe në nivelin e indeve të buta parodontale. Fillimisht gingiva inflamohet dhe duket e kuqe, e fryrë dhe me tendencë për gjakrrjedhje, më pas problemi përparon duke prekur indet më të thella deri në kockën mbështetëse, që dalëngadalë mund të riabsorbohet deri në humbjen e një ose më shumë dhëmbëve. Nëse diagnostikohet diabeti, pra, është e nevojshme të bëhet menjëherë një vizitë nga parodontologu dhe t'i nënshtrohesh një monitorimi të rregullt, për të evituar zhvillimin e një sëmundjeje ose për ta zbuluar para kohe dhe për ta trajtuar me sukses."

Duhet pasur kujdes edhe ne rastin e kundërt, kur pacienti vuan nga parodontiti, sepse sëmundja influencon kontrollin dhe progresionin e diabetit duke favorizuar ngritjen e glicemisë; në rastet e rënda mund të çojë edhe në zhvillimin e saj, sepse përkeqëson kontrollin e sheqernave në gjak. "Në prani të parodontitit bakteret e zvagrës së gojës nëpërmjet qarkullimit mund të arrijnë në shumë organe, duke shkaktuar reaksione të rrezikshme inflamatore" - pohon Gatti - "Parodontiti sjell një rritje të prodhimit të citokineve inflamatore që mund të kontribuojnë në insulino-rezistencën, një rritje të acideve yndyrore të lira dhe një rënie të prodhimit të oksidit nitrik në enët e gjakut. Parodontiti përveç kësaj rrit riskun e diabetit duke nxjerrë hemoglobinën e glikuar, tregues i një kontrolli të keq glicemik; efekti është veçanërisht i shënuar sidomos tek individët me nivele të larta të proteinës C-reaktive, një markator i inflamacionit. Në fund" - vijon Gatti - "te personat që kanë parodontit dhe janë dibetikë është vëzhguar një kontroll më i keq i glicemisë dhe një risk më i madh i zhvillimit të komplikacioneve: te personat që kanë diabet të tipit 1 janë më të mundshme pasojat e rënda renale dhe kardiovaskulare, te pacientët me diabet të tipit 2 është më e shpeshtë insuficienca renale terminale dhe vdekshmëria kardio-renale është 3,5 herë më e madhe në krahasim me pacientët pa probleme parodontiti. Prandaj është shumë e rëndësishme të menaxhohet inflamacioni me një terapi të përshtatshme parodontale për të ndihmuar personin diabetik të mbajë nën kontroll gliceminë: t'ia dalësh mbanë do të thotë të favorizosh një përmirësim të shëndetit parodontal, në një qark virtuoz që përmirëson mirëqenien e përgjithshme."

Shpesh parodontologu mund të vërejë manifestime orale ose shenja pre-diabeti përpara se pacienti të jetë në dijeni të tij: vizita të rregullta dhe periodike kontrolli te dentisti mund të ndihmojë popullsinë e përgjithshme në parandalimin dhe në diagnozën e hershme të diabetit dhe prandaj SIdP ka ndërmarrë një fushatë sensibilizimi të profesionistëve të shëndetit dhe të popullsisë, për të promovuar një parandalim të duhur dhe trajtimin e parodontitit. Këshilla kryesore për këto raste është që të kryhen vizita të rregullta te dentisti.

"Të zbulosh parodontitin dhe ta trajtosh në kohë mund të reduktojë në mënyrë të konsiderueshme komplikacionet e pacientit diabetik dhe anasjelltas identifikimi i pacientëve në risk për diabet është i rëndësishëm për parandalimin dhe monitorimin e sëmundjes parodontale, duke vendosur një dekurs trajtimi dhe parandalimi që parashikon një higjenë të kujdesshme orale në shtëpi. Stomatologu mund t'i kërkojë pacientit disa ekzaminime të gjakut nëse është e nevojshme dhe kush ka një parodontit të rëndë dhe familjaritet me shkallën e parë të diabetit të tipit 2, duhet t'i këshillohet një vizitë diabetologjike" - përfundon Gatti.

Përktheu: Valbona Spahia